Zakaria thlavâng hauhin New Builum mipui District Jail bulah pungkhawm

Mi kut tuara September 20, 2026-a thi Zakaria Lalhriattluanga, New Builum thlavâng hauh nan leh kut thlaktua puhte hmel hmuh phûtin New Builum mipuite chu nimin khan Kolasib-ah an pungkhawm.

Thu dawn danin, New Builum mipuite hi Zakaria kut thlaktute hmel hmuh phûtin Kolasib District Jail bulah an pungkhawm a, anmahni lo dangtu police-te nen an innawr a, buaina lian erawh a chhuak lo. Mipuite hi Zakaria Lalhriattluanga kut thlaktua puhte zinga jail-a awm mek mipa panga leh hmeichhia pakhat te hmel hmuhtir an nih hnuah an ṭîn darh.

New Builum mipuite hi District Jail bula an punkhawm hnuah Diakkawn Park Kâwnah an pungkhawm leh a, chumi hnuah Kolasib DC pisa tualah minute 10 vel chhung an pungkhawm leh bawk.

Tarlan tawh angin, Zakaria Lalhriattluanga tualthihna kaihhnawihah hian Kawnpui Hmar Veng mi vek mi pariat man an ni a, mi parukte chu September 21, Thawhṭanni tlai khan jail-ah dah niin, mi pahnih chu kumtling lo an nih avangin Juvenile Justice Board kutah hlan an ni.