Kawlphethain mi 3 a man hlum

September 19, Inrinni khan Seṭhawn, Kolasib district-ah kawlphetha (electric current)-in mi pathum a man hlum a, mi dang pathum an hliam.

Vanglaini thu dawn danin, national highway thlúr li (four lane) tura zauh hna thawh mekah electric ban sawn ngai a awm a, kawng enkawltu NHIDCL hnuaia contractor/company-in an thawk. Electric ban sawn hna thawktu mi paruk chu nimin khan electric current-in a man a, electric ban an tunnaah electric line a tawk palh nia hriat a ni.

Kawlphethain a man mi paruk zinga pathum chu nikhaw hre loin an awm nghal a, mi pathum erawh chu an harh thung. Kolasib damdawi-in panpui nghal an ni a; nikhaw hre loa awm mi pathum - Lalrinawma (18) s/o Rinmawia, Vawngawnzo, Mamit district, Lalruotfela (20) s/o Ramsanlien, Thingpuikuol, Manipur leh, Thianhumhim (16) s/o Hrangliandum, Haikhawl, Myanmar te chu an hliam tuar loin an thi a ni.

Mi pathumte ruang hi Kolasib District Hospital-ah endik (postmortem) a nih hnuah an chhungte hnenah hlan a ni a, an khua panpui an ni.

Kawlphethain a man dang pathum - Upal Chakma (17), Tlabung Zodin, Lallawmzuala (22), Zokhawthar leh, Siangremlal (16), Haikhawl, Myanmar te chu Kolasib District Hospital-ah enkawl an ni a, ngaihtuahawm an ni lo nia thu dawn a ni.