Dik loa family pension late zawng chhuak turin task force-te an thawk chhuak dawn

Mizoram sorkarin dik tawk loa family pension late tana mahni thua pek let (surrender) hun a tawp hnu October 1, 2026 aṭangin task force an thawk chhuak dawn. Mahni thua pek let hun September 30, 2026-ah a tawp dawn.

Finance department aṭanga thu dawn danin, department chuan June 16, 2026 khan 'Dik tawk loa family pension late surrender-na hun hawn chungchang' tih thupui hmangin office memorandum an chhuah tawh a; September 30 hnua dan loa pension la an la awm chuan sorkarin hma a la zui dawn a ni.

October 1, 2026 aṭangin dan loa family pension late zawng chhuak turin district tinah task force an che chhuak dawn a; task force hian hma an laknaah a ṭul angin YMA branch-te leh pawl dangte an thawhpui dawn. Hemi atan hian Central YMA chuan YMA branch tin hnenah lo thawhpui tura ngenna July 22, 2026 khan a tichhuak tawh.

Hun tiam chhunga family pension lehkha pawimawhte pe let lo, dan loa pension la chhunzawm hmuh chhuah a nih chuan task force leader hmingin show cause notice pek tur a ni a; chumi hnuah a ṭul dan azirin police station hnai berah thubuai ziah luh a ni ang.