Dik takin police lak leh kan tum - Home Minister

Home minister K Sapdanga chuan, police constable 350 lak leh turah, police lak hnuhnung bera dik taka an lak anga lak leh an tum thu a sawi.

Nimina Mizoram Police Service Association inkhawmpui a hmanpuinaah K Sapdanga chuan, "Police constable recruitment batch hnuhnung ber kha politics inrawlna awm miah loin, a ti ṭha ṭha kan la. Officer-te thawhrim vang a ni," a ti.

Home Minister chuan, police lâk rûnpui an buatsaih dawn thu sawiin, "A ti ṭha ṭha lak leh kan tum ang. Kan department kan indaih phah sawt ang a, ṭhalai 350-in eizawnna an neih theih phah dawn bawk," a ti a, police an la leh tur chu lawmawm a tih thu a sawi.

K Sapdanga chuan sorkarin post 350 hnawh khah phalna a pek thu sawiin, "Post ruak zat 4,717 ngaihtuah chuan a beitham a, sorkar sum dinhmun ngaihtuah erawh chuan lawmawm tak a ni," a ti.