Faina beihpui thlakna hawn a ni

India ram puma faina beihpui thlakna, 'Swachhata Hi Seva 2026' chu nimin khan Mizorama kalpui turin UDPA minister K Sapdanga'n UDPA directorate auditorium-ah hawng. Minister chuan, ram fai ni turin ṭhalaite leh zirlaite an pawimawh zual thu leh, fai turin tlawmngaihna nen hmalak a pawimawh thu a sawi.

Swachhata Hi Seva hi September 17 - October 2, 2026 chhunga hman tur a ni. Mizorama khua/veng tinah zirna-in, bazar, tuikhur, mipui punkhawmna hmun, veng chhung, mahni in bul, zun/ek-in tihfai beihpui thlak a nih dawn a; khawlai tifaitu sanitation worker-te chawimawina leh hriselna endikna buatsaih a ni bawk ang.

October 1, 2026 khian darkar khat chhung faina hnatlangpui 'Ek Din, Ek Ghanta, Ek Saath' neih a ni dawn a; khawpui leh thingtlang khaw tinah kalpui tura ruahman a ni.

K Sapdanga chuan, zirchianna hnuhnung berah Aizawl chu India rama state khawpui fai pakua zingah a tel thu a sawi a, "Khawpui lian 476 zingah 35-na a ni a, hmarchhak bialah phei chuan Aizawl hi a entawn tlak ber tia sawi a ni... Faina hi i nunpui ang u, kan nunah bet tlat rawh se," a ti.

UDPA Minister chuan, "Fai turin ṭhalaite, a bikin zirlaite an pawimawh zual a, faina kawnga nu leh pa, pi leh pute kaihruai thei tu ber chu ṭhalaite an ni. Faina hi a bik takin ṭhalaite thinlungah nghet takin i tuh ang u," a ti a; faina beihpui thlak chu balh vang ni loin, fai reng tura hmalakna a nih thu a sawi.

Fainaah Mizoramin hma a sawn lehzual theih nan tlawmngaihna nen kal kawptir ṭha a tih thu sawiin K Sapdanga chuan, "Tlawmngaihna nena hmalak a nih chuan faina hi kan nunah a bet chho ang a, hmalakna a chak lehzual ka ring. Tun hnaiah khaw tê zawkte'n faina kawngah khawpui an lehpêl nasa hle a, an entawn tlak tak zet a ni," a ti. Kohhran leh tlawmngai pawlte'n faina lamah hma an la ṭhin leh an nunpui chho zel chu lawmawm a tih thu a sawi bawk.

Khualzahawm Prof. Lalnilawma, PHE minister chuan, faina inzirtir thar zel a pawimawh thu a sawi a, "India rama ziak leh chhiar thiam vekna hmasa ber kan ni a, lehkhathiam tamna kan nihna hi faina kawnga hmasawn nan kan hman a ṭul," a ti.

PHE Minister chuan, Mizoram chu hma sawn hle tawh mah se, hmasawnna tur tam tak a la neih thu sawiin, "Motor aṭanga bawlhhlawh paih chhuakte kan la awm a, a hun tawh lo," a ti a; faina lamah mi tin an ṭanrual chuan Mizoram chu India rama state fai ber a nih theih thu a sawi.

Faina beihpui thlak hawnna hi PHE secretary Zodingpuii'n a kaihruai a; UDPA secretary V Lalsangliana'n thu a sawi bakah, UDPA director Jacob Lalawmpuia'n Swachhata Hi Seva kalpui dan tur a sawifiah. UDPA joint secretary Zarzokimi kaihhruaiin faina thutiam sawi rual a ni. Swachhata Hi Seva hi nimin khan district tinah hawn a ni bawk.