MNF-te'n kawng chhia an siam

Reiek leh Chungtlang pêng inkar kawng chu a chhiat em avangin MNF Dampa East Block chuan nimin khan hnatlangin an thawm ṭha. ZPM kaihhruai sorkarin kawng chhia a siam ṭha thei lo nia sawin, vanduaithlak an tih thu an tarlang.

Kawng thawm ṭhat hnatlangah hian Reiek, Khawrihnim, Chungtlang leh West Lungdar khuaa MNF member 100 chuang an thawk chhuak a; kawng khuar hnawhna tur lung eng emaw zat bialtu MLA Dr R Lalthangliana'n a tum a ni.

MNF Dampa East Block chuan, ZPM sorkarin kawng chhia a ngai pawimawh lo hle nia sawiin, "Kawng chhe laite a siam ṭha thei lo hi vanduaithlak kan ti a, hnatlanga thawh chhuah hial a lo ngai ta a ni," an ti a; kawng a chhiat êm avangin two wheeler leh car tan kal hleih theih a nih loh thu leh, damlo, tar chak lo leh nu nau khualzinte tan harsatna a thlen nasat zual thu an tarlang.