MUHCS-a sorkar leh Synod inremna pe chhuak turin MIC-in MSHCS a hriattir

Mizoram chief information commissioner (CIC) John Neihlaia chuan Mizoram State Health Care Society (MSHCS) chu Mizoram Universal Healthcare Scheme (MUHCS) chungchanga MSHCS leh Synod Hospital inremna thuthlung, Memorandum of Agreement (MoA) September 23, 2026 aia tlai loa pe turin a hriattir.

Mizoram sorkar leh Synod Hospital inremna thuthlung hi RTI Act hmangin J Malsawmzuala Vanchhawng chuan MSHCS-ah a dil a, an pek theih loh avangin diltu chu Mizoram Information Commission (MIC)-ah a zualko. CIC chuan inremna thuthlung chu pe chhuak turin MSHCS SPIO a hriattir a ni.

CIC thupek hi MSHCS chuan Gauhati High Court-ah an khing a, High Court Aizawl Bench chuan August 17, 2026 khan Judgment & Order a chhuah. Court hian MSHCS leh Synod Hospital MoA chu sorkar healthcare scheme, sorkar/mipui sum hmanna a nih avangin RTI Act Section 8(1)(d) emaw, 8(1)(d) emaw (mimal thil leh sumdawnna thup ngaite thup theihna)-in a huam loh thu a tarlang. CIC-in third party (Synod) ráwn loa thupek a chhuah chu a dik loh thu a tarlang bawk.

High Court-in order a chhuah hnuah CIC chuan September 2 khan hearing a nei a, MSHCS aiawhte an inlan bakah, Synod Hospital aṭangin director Dr RL Sanghluna leh coordinator Lalrinmuana te an inlan.

Synod Hospital aiawhte chuan damdawi-in chu sumdawnna a nih loh thu te, MoA-ah hlauhthawn tur a awm loh thu te, rate zat pek chhuahin damdawi-in tan nghawng ṭha lo a neih loh tur thu sawiin, MoA pek chhuah chu dodalna an neih loh thu leh, Synod hotute pawhin an dodal an rin loh thu an sawi. MoA chu MSHCS leh Mizoram Synod inremna a ni a, MoA-a hming ziaktute pawh Synod hotute an nih avangin thutlukna siam thei an nih loh thu an sawi tel.

MIC chuan September 2 vêk khan Synod Executive Secretary i/c Synod Hospital hnenah lehkha thawnin, inremna thuthlung pek chhuah an remtih leh remtih loh a zawt. Synod executive secretary Rev. Dr K Lallawmzuala chuan September 4 khan chhángin, Synod Hospital aiawhte thusawi chu a pawmpui tih MIC a hrilh.

CIC chuan September 14-a hearing a neih leh hnuah nimin khan order a chhuah a; MUHCS chungchanga MSHCS leh Synod MoA chu September 23, 2026 aia tlei loah a thlàwna RTI Act hmanga diltu hnenah pe turin MSHCS state public information officer leh chief finance officer Dr K Lalnghinglova a hriattir a ni.