Sewa Sankalp Abhiyan hmang dawn

BJP, Mizoram Pradesh president Dr K Beichhua chuan, September 17 - October 17, 2026 chhung­in prime minister Narendra Modi-a pian champha pual leh kum 25 chhung ram hruaitu a nih lawmna 'Sewa Sankalp Abhiyan' hman a ni dawn a, Mizoramah pawh thil chi hrang hrang an buatsaih dawn thu a sawi.

Dr K Beichhua hian nimin khan Aizawla BJP pisaah thuthar theh­darhtute a kâwm a; Sewa Sankalp Abhiyan chung­chang sawifiahin, "Campaign hi PM Pu Narendra Modi-a pian cham pual leh ram hruaitu (constitutional head)-a kum 25 chhung tehmeuh châwl loa rawng a bawlna, Gujarat chief minister a nih hnua India ram prime minister a nih chhunzawm hriatrengna leh lawmna puala buatsaih a ni," a ti.

BJP-in kum tam tak chhung Narendra Modi pian champha (September 17) pualin Mahatma Gandhi pian champha (October 2) thleng mipui vantlang tana luan chhuahna (Seva Pakhwada) an hman ṭhin thu sawiin Beichhua chuan, "Kuminah chuan Pu Modi-a'n mipui tana rawng a bawlna kum 25-na a tlin kum a nih avangin thla khat awh Sewa Sankalp Abhiyan hman tur a ni," a ti a; thupui chu 'Mipui rawngbawlna chu Pathian rawngbawlna a ni' (Jan Seva Hi Prabhu Seva) tih a nih dawn thu a sawi.

BJP President chuan, Sewa Sankalp Abhiyan-in a tum chu, mipui tana rawngbawlna neih tam te, PM scheme a tam thei ang ber puanzar leh mi retheite dinhmun ṭhaa chawi kan te a nih thu a sawi a, "BJP Mizoram chuan September 17 zanah Aashirwad Ka Diya kan hmang dawn a, a tûk ni 18-ah thisen pek rûnpui kan nei dawn," a ti. Hun an hman turah tel ṭheuh turin Mizoram mipui a sáwm.

Sewa Sankalp Abhiyan pual hian Mizoram BJP chuan zirlaite tana lemziak leh thusawi intihsiak an buatsaih dawn a, anganwadi leh ASHA te hnenah chawimawina an hlan dawn. Thupui hrang hrang hmanga rawngbawlna te, central leh state sorkar scheme chungchang inzirtirna te, Viksit Bharat 2047 hmathlir tihlarna hun te an buatsaih dawn bawk a ni.