MP fund a daihzai thei ang bera hman ka tum - MP (LS) Richard

Lok Sabha MP Richard Vanlalhmangaiha chu nimin chhun khan Aizawl Press Club-ah lêngin, MJA hruaitute nen an inkâwm. MP chuan, Mizoram mipui MP a nih thu sawiin, MP fund pawh a daihzai thei ang bera hman a tum avangin Mizorama khaw 94-a sikul tihchangtlunna atan a pek tawh thu a sawi.

Richard Vanlalhmangaiha chuan, ZPM party mi ni mah se, Mizoram mipui zawng zawng aiawh a nih thu sawiin, "Thil thlen dan leh a hmun leh a hun azirin a changin Kristian MP te, minority MP leh North East MP nih chângte ka nei. Lok Sabha-a MP zingah Kristian 22 kan awm a, ram chhunga Kristiante'n harsatna an tawh chángin kan theih ang angin hma kan la ve a, kan inhmu khawm ve ṭhin," a ti.

MP fund chu a daihzai thei ang bera hman a tum thu sawiin MP Richard-a chuan, "Tunah hian Mizorama khaw 94-a zirna-in hrang hrangah MP fund kan pe tawh a, dilna 50 vel a awm mek. Mipui a tam thei ang berin MP fund an chhawr theih nan hmalak zel ka tum a, ram leh hnam tan theihtawp chhuah zel ka tum," a ti a; ram rawng a bâwlnaah thláwp zel turin Mizoram mipui a sáwm.

Lok Sabha MP chuan, MP a nih hnuah a hmalakna zarah Mizoram sorkarin sorkar laipuia project a thehluh tihhlawhtlin mai loh (project pending) cheng vbc 668.52 hû pek a ni tawh tih sawiin, "Hei bakah hian PMGSY-I hnuaiah GST liability cheng vbc 150 vel pek chhuah a ni a, hei hi project tihtawp tawh, ka hmalakna vanga hawn thar leh a ni," a ti. NH-306A Vairengte-Vaitin inkar kawng siamna tur cheng vbc 99.78 pawh tun hnaiah pek an nih thu a sawi.

Richard Vanlalhmangaiha chuan, kum tin MP fund an dawn bakah, inṭhian ṭhatna hmanga sum pawh chhuah tur tam tak a awm ṭhin thu sawiin, "Theihtawp chhuah ka tum a, Mizoram chanpual bakah sorkar laipui aṭanga sum a tam thei ang ber pawh chhuah ka tum a ni," a ti.

Mizoram Lok Sabha MP hi Parliamentary Standing Committee on Defence-ah kum hnih chhung member a ni tawh a, tun hnaiah Parliamentary Standing Committee on Finance member atan ruat thar a ni.

MP Richard Vanlalhmangaiha hi MJA president Vanlalrema Vantawl leh hruaitu dangte'n lo dawngsawngin, thilpek an hlan a; inpawh takin an inkâwm a ni.