Hindi Diwas-ah Hindi Concert buatsaih

Greenhill Public School, Aizawl chuan nimin khan Hindi Diwas pualin Vanapa Hall-ah Hindi Concert an buatsaih a; khuallian Governor Gen. Dr Vijay Kumar Singh chuan, mi dangte hnam ziarâng, nunphung leh ṭawngte zira inchhiar zau turin zirlaite a chah.

Hindi Concert-ah hian Greenhill Public School zirlaite leh zirtirtute'n hnam làm leh zai chi hrang hrang an entir a; Pradhan Mantri Rastriya Bal Puraskar awardee Esther Lalduhawmi Hnamte a zai bawk.

Larsap chuan, Hindi thiam a pawimawh thu sawiin, "Kan hnam ziarâng behchhan leh vuan chung zelin kan inthlak danglam tur a ni a, a nih loh chuan hlawhtlinna kan nei thei dawn lo. Mizoram sorkarin zirna-inah chawlhkar khata ni khat Hindi ṭawng hman ní kalpui a tum hi a lawmawm tak zet," a ti a; mi dangte hnam ziarâng, nunphung leh ṭawngte zir tur leh India history-te zir nasa turin zirlaite a fuih a ni.

Zirna, hnathawhna, sumdawn-na leh khualzin dawnsawn kawng-ah ṭawng dang thiam a ṭangkai thu sawiin Governor chuan, "Ṭawng thiam tur chuan tihsual palh pawh a awm thei, mahse, hlauh loh tur a ni a, tih dik lohna aṭang zel hian kan inzir ṭhin," a ti.

Gen. Dr VK Singh chuan, "Kan talent-te hi state chhungah chauh a tàwp mai loh nan state páwn leh khawvel hmun dang thlenga kan pho chhuah a ngai a, chumi tur chuan ṭawng dang kan zir a pawimawh," a ti a; mahni hnam ziarâng leh nunphung hloh chuang loa hawiher leh thlen chin tizau zel a ṭul thu a sawi.

Khualzahawm Dr Vanlalthlana, Education minister pawhin thu sawiin, "India hi ram zau leh ze hrang hrang nei, ṭawng hrang hrang hmangtute awmna a nih avangin mipui tam zawkte ṭawng hman Hindi kan thiam a pawimawh. Mizo hnam ziarâng leh nunphung vawng chungin Hindi hi zir theih a ni," a ti a; Mizo zirlaite'n Hindi an thiam theihna tura Greenhill Public School hmalakna chu fakawm a tih thu a sawi bawk.

Hindi Concert-ah hian Greenhill Public School director Rev. Dr K Thanzauva pawhin thu a sawi a; minister Lalthansanga leh Padma Shri dawngtu C Kamlova te pawh an tel a ni.