Revenue dept hmachhawp sawiho

Land Revenue and Settlement (LRS) department hotute chu nimin khan an minister B Lalchhanzova hoin a pisaah an ṭhukhawm a; department hmalaknate leh hmachhawpte an sawiho.

B Lalchhanzova chuan, LRS department-a thawkte fakna thâwm anmahni dawrtute aṭangin a hre ta fo tih sawiin, hmasawnna nasa tak nia a hriat thu a sawi a, ṭan la zel turin a chah.

LRS department chu department inrêlbàwlna ruhrel siamṭhat leh mipui service tihhmasawnna lamah thawk ṭha ber pawl a nih mek thu sawiin Minister chuan, "Hmasawnna tur erawh tam tak a la awm," a ti a; ṭang mar zel turin thawktute a fuih.

Ṭhutkhawmah hian Revenue department-a thawktu indaih lohna phuhrûk dan tur te, mimal ram buai chinfel ngai te, sorkar ram mumal taka chhinchhiah dan tur te, department dang nena thawhho zel dan tur te, sorkar sum hnâr tihchak dan turte leh thil pawimawh dang eng emaw zat an ngaihtuah a ni.