Remsiami hockey ground siamna tur en

Assembly deputy speaker Lalfamkima, Kolasib bialtu MLA chuan nimin khan 'Lalremsiami Hockey Playground' siamna tura ruahman Kolasib Diakkawn GSA Playground a enfiah.

Lalremsiami Hockey Playground siamna hmun atan hian Kolasib Diakkawn GSA leh Kolasib District Hockey Association chuan inremna an siam a; inremna ang chuan khelmual zawl awm sa chin chu hockey khelmual atan ruahman a ni. Inremna hi kum thum chhung atana tih phawt a ni a, a ṭul anga pawhsei theih a ni. Kum 2028 thlenga sorkar hmalakna a awm loh chuan inremna hnuh kîr leh tur a ni thung.

Lalfamkima chuan, Kolasib Diakkawn GSA (Games & Sports Association) leh Kolasib District Hockey Association te inremsna angin GSA Playground chu hockey khelmual atana hman turin ruahman mek a nih thu a sawi a, "Khelmual leh a kaihhnawih hmunhma tur te, a záwl chin awm sa zau zawng leh sum mamawh zat turte chu PWD leh hockey lama thuneitute'n uluk taka an siam hnuah Planning department-ah thehluh a ni ang," a ti.

Mizoram sorkarin Lalrem-siami Hmar chawimawina atan a hming chawiin hockey khelmual a ruahman tih sawiin Lalfamkima chuan, "Khelmual hming atan hian 'Lalremsiami Hockey Ground, Diakkawn Field' tih a ni ang," a ti. Lalremsiami chuan August 18, 2026 khan India rama infiammite chawimawina sang Arjuna Award a dawn thu a sawi bawk.