NH-a harsatna chinfel dan tur sawiho

Kolasib district bawrhsap H Dolian­buaia kaihhruaiin nimin khan Kolasib district-a National Highway 306 & 06 thlûr lia siam thawh mek chungchang leh a kaihhnawih harsatnate chinfel dan tur sawiho a ni a; zangnadawmna dawng turte'n an dawn thuai theih nan thehtawp chhuah turin NHIDCL hotute an chah.

H Dolianbuaia chuan, Package-7 huam chhunga ram neitu zingah zangnadawmna la dawng lo eng emaw zat an awm chu pawi a tih thu sawiin, "Zangnadawmna la dawng lote hi mi harsa tak tak, an ram leh hmunhmate eizawnna leh intunnun nana hmang an ni hlawm a, a hma thei ang bera zangnadawmna an lak theih nan NHIDCL hian theihtawp in chhuah a ngai," a ti a; fûr ruahtui tla a ziaawm chhoh dawn avangin ṭhahnemngai taka thawk turin kawng siamtu contractor-te a chah.

Ṭhutkhawmah hian sorkar hotu te, Mizorama NH enkawltu National Highways and Infrastructure Development Corporation Limited (NHIDCL) leh an hnuaia contractor te, khawtlang hruaitute an tel a; NHIDCL hotute leh ram neitute'n an din Joint Action Committee, Fourlane hruaitute'n an dinhmun an sawifiah.

Competent Authority for Land Acquisition (CALA) B Malsawmtluangi, additional DC-in ram neitute'n an chanvo dik tak an neih ngei theih nan nasa zawka hma la turin NHIDCL hotute a chah a ni.