KHAWTHLIR

Sorkarin râl

Mizoram sorkar chuan September 11, 2026-a tuihâwkin a lak vanga thi Ruby Lalrinsiami (6) d/o B Lalbawiliana, Lawngtlai College Veng chu State Disaster Response Fund aṭangin Rs 4,00,000-in a râl. Ràlna pawisa (ex-gratia) hi nimin khan Lawngtlai district bawrhsap Donny Lalruatsanga'n Ruby Lalrinsiami nu leh pate hnenah a hlan a ni.

Tuichang luia tla hlum ruang hmu

September 12, 2026 chhun dar 12 vela Tuichang lui Hmunzawl kaia tla hlum Zoramchhana (39) s/o Chawimawia, Khawlailung ruang chu nimin zing dar 5:15 vel khan hmuh a ni. Thu dawn danin, Zoramchhana ruang hi a tlâkna aṭanga km 2 vela hláa tuitla zawngtute'n ngar an hèm bulah hmuh a ni.

AR-in heroin leh pistol an man

Assam Rifles chuan September 13, Pathianni khan Zokhawthara Iron Gate-ah mi pahnih hnen aṭangin heroin (no. 4) gram 44 an man a, Zokhawthar Police Station-ah dan anga hmalak zui turin an hlan. September 12, 2026 khan Assam Rifles sipaite chuan Saron Veng, Aizawlah mi pakhat hnen aṭangin USA siam pistol (.32 mm calibre pistol) pakhat, magazine pakhat leh a mu pathum an man bawk a; Aizawl Police Station-ah an hlan a ni.

EMRS kalpui dan tur sawiho

Eklavya Model Residential School (EMRS) Management Committee, Lawngtlai chu nimin khan an ṭhukhawm a; Lawngtlai district bawrhsap Donny Lalruatsanga'n kaihruaiin, ṭha zawka sikul inenkawlna leh inthununna kalpui an rêl bakah, sikul hmasawnna atana pawimawh hrang hrang sawiho a ni. Tarlan danin, Lawngtlai district-ah EMRS pahnih a awm a; EMRS Chawnhu-ah zirlai 212, zirtirtu 19 leh non-teaching staff 26 an awm a, EMRS Chawngte-ah zirlai 291, zirtirtu 26 leh non-teaching staff 24 an awm a ni.