March 2027-ah gas pipeline hmang hman turin hmalak a ni - Supply Minister

Indradhanush Gas Grid Limited (IGGL)-in Panisagar, Tripura aṭanga Sihhmui thlenga natural gas pipeline an phûm mek chungchang nimin khan Food, Civil Supplies and Consumer Affairs minister B Lalchhanzova hoin a pisaah sawiho a ni. Minister chuan, March 2027-ah chuan Mizoramah pipeline hmanga gas herh haw theih tuma hmalak mek a nih thu a sawi.

IGGL hotute'n Tuidam leh Darlak inkarah hna an thawk mek a, mahse, pipeline phûmna turah harsatna an tawh thu an sawi chungchangah FCSCA Minister chuan, October 2026 chhungin a hoin IGGL, FCSCA department, PWD leh Mamit DC te nen a hmunah en ni se a ti a, thil ṭulte ruahman turin FCSCA department official-te a chah.

B Lalchhanzova chuan, Mizoram sorkarin IGGL gas pipeline chu a hunah ṭha taka zawh a nih theih nan theihtawp a chhuahpui zel dawn thu sawiin, FCSCA bakah, Commerce and Industries department pawh an inhawn thu a sawi a, "Mizoramah March 2027-ah chuan hmang ve hman tura hmalak a ni," a ti.

Supply Minister chuan, IGGL leh Tripura Natural Gas Company te ram mamawhte a rang thei anga an chinfelsak zel ṭhin thu leh, hmalakna dangte pawh an ûmzuisak zel dawn thu a sawi bawk.

FCSCA secretary Ravi Dadhich chuan, pipeline phûmtu contractor-te'n chak zawka hna an thawh theih nan ṭan la turin IGGL hotute a chah a; IGGL-in harsatna an sawi chungchangah, "Mizorama hnathawh hi thil awlsam tak a ni lo tih chu hna ṭan hmaa hriat sa a ni a, chuvangin hna thawh muan nan chhuanlam a tling lo," a ti.

Ṭhutkhawmah hian FCSCA department officer-te bakah, PWD chief engineer (Highways) Robin Lalrinawma leh Aizawl DC aiawhte an tel a, video conference-in Mamit DC leh IGGL hotute an tel bawk.