Vanduaina thlengah mi 4 an thi; Tuichang luia tla zawn mek a ni

September 11 leh 12, 2026 khan Mizoram hmun hrang hrangah chetsualna leh vanduaina thlengah mi pali an thi. Hetihlai hian, Tuichang luia tla Zoramchhana (39) s/o Chawimawia, Tuichang chu zawn mek a ni.

September 11, Zirtawpni tlai dar 5 vel khan Ruby Lalrinsiami (6) d/o B Lalbawiliana, Lawngtlai College Veng chu an in bula tui luankawrah tuihâwkin a la a, metre 300 vel a lên. Ruby-i hian tui luankawrah a ke a chiah a, chesualin tuihâwkin a la a, tuiin a len tawpnaah thia hmuh niin, September 12 khan vui a ni.

September 12, Inrinni zing dar 4 vel khan Vairengte Zalen Vengah leiminin chenna in pahnih a hnâwl a, Zohmingliana (14) s/o Lalramneiha a thi.

Thu dawn danin, Vairengtea leimin hian Mamlalliana in leh an kawmthlanga a fapa Lalramneiha in a hnâwl. Vanduaina thlenna hmunah Zodingliana a thi a, zing dar 7:30 velah in chim kar aṭangin a ruang lak chhuah niin, tlaiah vui a ni. Mamlalliana leh a fapa Lalramneiha te pawh an hliam a, Silchar damdawi-in panpui an ni.

September 12, Inrinni chawhma khan Lianṭhuama (60), Thingdawl Hmarveng chu léngkìr bulah thia hmuh a ni a, a tla hlum nia rin a ni.

Thu dawn danin, Lianṭhuama hi a makpa nen September 11, 2026 khan Thingdawl rama luiah chakai meichher chhit turin an kal a, lui an thlen hnuah an kal hrang. Innghahna hmun tura an sawiah a let mai loh avangin a makpa hian a hawsan a, a haw ve tâk loh avangin September 12 zing dar 6-ah zawng turin a chhuak leh a ni.

Mi dangte inpun belh zelin an zawng a, luia léngkìr hnuai bulah thiin hmuh a ni. Lêngkirah a tla nia rin niin, lengkir hnuaia tuia a tlak hnuah a sir vaukamah a vak phei a, a hliam tuar loin a thi nia rin a ni. Tlai dar 4 hnuah an in thlenpui niin, nimin khan vui a ni.

September 12, Inrinni tlai dar 4 vel khan Thingdawlah balu phur truck-in Danial Vanlalmalsawmpuia (7) s/o Ricky Vanlalpeka, Thingdawl a hnawl a, a hmunah a thi.

Thu dawn danin, Danial Vanlalmal­sawmpuia hi a ṭhiante nen kawng sirah an infiam laiin truck-in a hnâwl a, ká chhawn loin a hmunah a thi. A ruang hi Inrinni zan khan lumen a ni a, nimin khan a ruang endik a nih hnuah vui a ni. Lirthei khalhtu chu khawtlang hruaituten manin, Kolasib Police hnenah an hlan.

Zoramchhana (39) s/o Chawimawia, Khawlailung chu September 12 khan Hmunzawla cement pe tura a kalnaah chhun dar 12 velah Tuichang luia Hmunzawl kaiah a tla a, nimin tlai lam thleng khan hmuh a la ni lo.

Thu dawn danin, Zoramchhana hi mi pakhat nen cement pe turin an kal a, Tuichang lui a len avangin mihring kal theihna leiah cement a phurh chu an inhlan chhâwng a ni. Cement inhlan chhàwn a nih lai hian Zoramchhana chu tuiah a chêng a, tuilianin a la zui ta a ni.

Zoramchhana hi Khawlailung khaw mite bakah an khaw chhehvel leh Serchhip Sub-Headquarters YMA hruaitute'n an zawng a; nimin tlai lam thleng kha chuan hmuh a la ni lo.