VB-GRAMG-ah ni 125 inhlawhna siam theih ngei kan beisei - RD Minister

Rural Development & Administration (RDA) minister Prof. Lalnilawma chuan, sorkar kum kal mekah Viksit Bharat – Guarantee for Rozgar & Ajeevika Mission (Gramin) (VB-G RAMG) hnuaiah Mizoramah ni 125 inhlawhna an siam theih ngei an beisei thu a sawi.

Vanglaini palai zawhna chhangin RDA Minister chuan, ni 100 inhlawhna tia hriat ṭhin MGNREGA thlaktu VB-GRAMG-ah chuan ni 125 inhlawhna kum khat chhunga siam tur a nih thu a sawi a, "Sorkar kum kal mekah April-June thleng chu MGNREGA a la ni a, July 1 aṭangin VB-GRAMG hman ṭan a ni. Kumin sorkar kum chhung hian ni 125 inhlawhna kan siam theih ngei kan beisei," a ti.

Prof. Lalnilawma chuan, kumin sorkar kum atan VB-GRAMG atana sorkar laipuiin Mizoram tana a bituk hmangin ni 125 inhlawhna an siam theih a rinawm tih sawiin, "April-June atan MGNREGA angin pawisa release a ni tawh a, VB-GRAMG bikah chuan a ṭum khatna atan July-September atan pawisa release a ni tawh," a ti a, thla thum zel atan sum pek a nih thu a sawi.

RDA Minister chuan, state sorkarin a tum ve tur 10% chu an dawn nghal thu sawiin, "VB-GRAMG-ah hian state sorkarin a tum ve tur a pek chhuah phawt a ngai a, chumi hnuah sorkar laipuiin an tum tur an release ve zel ang. Chief Minister-in VB-GRAMG atan pawisa an ngaihtuah zel tur thu a sawi a, a lawmawm khawp mai," a ti.

Hnathawktute July 2026 hlawh tur an pek chhuah mek thu sawiin Minister chuan, "July pek chhuah zawh a nih hunah August buaipui leh a ni ang. Sum kal kual vel dan a thui deuh a, tihchak a har," a ti a; MGNREGA-ah chuan sorkar laipui aṭangin hna thawktute account-ah thun a ni a, VB-GRAMG-ah chuan state sorkar kaltlangin hnathawktute'n an inhlawhna an dawn a ngaih thu a sawi.

Prof. Lalnilawma chuan, MGNREGA aiin VB-GRAMG-ah an duh khirh nia sawiin, "Hna an thawk ngei a ni tih finfiahna atan chawhma lam leh chawhnu lamah thlalak a ngai. Thlalaka awm lote chu an hlawh tur an pe chhuak thei lo. Kawng hrang hrangah MGNREGA aiin a khirh zawk mah a, sum chêt vel dan pawh a kual thui a, mahse, thil ṭha tak turah kan ngai," a ti bawk.