Education Minister-in Gujarat-a VSK a tlawh

School Education minister Dr Vanlalthlana hoin Samagra Shiksha, Mizoram hotute chuan September 10, Ningani khan Gandhinagar, Gujarat-a Vidya Samiksha Kendra (VSK) an tlawh a, Mizoram VSK tihchangtlun theih dan tur an zir.

VSK hi Gujarat sorkarin zirna-in, zirtirtu leh zirlaite vilna atan leh zirna tihhmasawnna atana a kalpui niin, India rama a hmasa ber a ni a; Mizoram Education Minister leh Samagra Shiksha hotute hi Gujarat sorkar hotute'n an lo dawngsawng.

Dr Vanlalthlana chuan, Mizoramah sorkarin zirna leh technology thlun zawmin theihtawpa hma lak a nih thu sawiin, "India rama VSK hmanga sûlsutu Gujarat tih dan ṭhate Mizorama hman a nih ve theih kan beisei a, Gujarat sorkarin zirna kawnga hmalakna ṭha in neihte pawh Mizoram mila her rem theih a ni," a ti. Gujarat Education department hotute pawhin Mizoram tih dan ṭhate entawn an tum thu an sawi.

Higher & Technical Education enkawltu ni bawk minister Dr Vanlalthlana hian New Age Makers' Institute of Technology (NAMTECH), Gandhinagar pawh a tlawh a; nakkuma zirna ṭan tumna Mizoram Engineering College (MEC)-in tunlai mil zirna a kalpui theih nan leh, zir chhuakte'n industry mamawh thiamna an zir chhuah theih nan NAMTECH chu thawhpuiah a sáwm a ni.

NAMTECH hotute chuan, an theihna zâwnah Mizoram sorkar nen thawkho tura an inhawn reng thu an lo hrilh.

Minister Dr Vanlalthlana hian IIT Gandhinagar-a Mizo awmte a tlawh bawk.