State Anti-Tobacco Day hman a ni

Nimin khan Mizoram hmun hrang hrangah Mizoram State Anti-Tobacco Day vawi 13-na hman a ni a; Aizawlah chuan Hospital and Medical Education auditorium-ah Health minister Lalrinpuii hoin hman a ni.

Aizawla Anti-Tobacco Day hmannaah hian Tobacco-Free Educational Institutions (TOFEI) School Challenge: Towards a Tobacco Free Generation, 2025-a pakhatna PM Shri Kawrthah Primary School-I hnenah leh consolation prize dawngtu Leitlangpui Higher Secondary School hnenah Minister-in lawmpuina a hlan.

Health Minister chuan, India rama cancer vei tamna ber Mizoram a nih chhan pakhat chu vaihlo a nih thu a sawi a, "Kan thupui 'Towards tobacco free home' tih a nih angin, kan in chhung khurah vaihlo aṭanga siam ti lo kan awm em, engtin nge kan sim ang tih hi ka vei a, tuna cess kan dawn tur aṭang hian nasa taka flying squad-te tichakin, hmun tinah kan intir chhuak ang a, a hmun loa zial zute manin, hrem ngaite hrem an ni dawn," a ti.

Vaihlo zûk leh hmuam nghei chu thil harsa a nih loh thu sawiin Minister chuan, "A nghei tawhte hi an nun a hlim zawk a, an ei a tui zawk a, an chak zawk. Kan state-ah hian vaihlo hi phal loh thil (ban) atan puan a ṭul," a ti a; mei zute vangin an bula a zu ve lote'n natna an kai theih tam tak a awm thu a sawi.

Lalrinpuii chuan, ram hrisel ni turin in chhung khur aṭanga bul ṭan a ṭul thu sawiin, "Ruihhlo tihna kawnga bul ṭanna tam ber chu vaihlo zûk leh hmuam a ni. Nu leh pate hi páwl vela inhman vak vak a ṭul lo, kan fate hian kan hmuh lohin eng nge an tih tih kan hriat a, kawng dika kan kaihhruai theih nan an bulah kan awm tam a ngai; hei hi kan ram damna atana pawimawh a ni," a ti.

Anti-Tobacco Day hmanna inkhawm hi National Tobacco Control Programme (NTCP) leh Indian Society on Tobacco & Health (ISTH), Mizoram Chapter te buatsaih a ni a, ANM School of Nursing leh Mizoram College of Nursing zirlaite an tel. NTCP nodal officer Dr Zoramthangi Renthlei-in Day thupui a sawi a, School Education director Angela Zothanpuii'n ToFEI chungchang an sawifiah. Vaihlo dona thutiam sawi rual a ni bawk.

Mizoram State Anti-Tobacco Day hi kum 2013 aṭang khan September 11-ah kum tin hman ṭhin a ni a, India rama state bila Anti-Tobacco Day nei hmasa ber a ni. Kumina thupui chu 'Towards tobacco free home' tih a ni.