Legislative Forum on HIV/AIDS ṭhukhawm; Minister-in thisen endik turin MLA-te a sáwm

Mizoram Legislative Forum on HIV/AIDS chu nimin khan Health minister Lalrinpuii hoin Secretariat conference hall-ah an ṭhukhawm a; Health Minister chuan thisen endiktir turin MLA-te a sáwm.

Ṭhutkhawmah hian MLA paruk - Lalmuanpuia Punte, TBC Lalvenchhunga, VL Zaithanzama, Lalchhuanthanga, T Lalhlimpuia leh K Hrahmo an tel.

Health Minister chuan, HIV bvei leh vei loh hre tura thisen endikah mipuite tihhmuhtu nih tum a, an thisen endiktir turin MLA-te a sáwm a; thu an sawinaah a tam thei ang ber thisen endik pawimawhzia leh HIV vei an awm palh pawha a rang thei ang bera ART damdawi ei nghal a ṭul thu uar taka sawi ṭhin turin a chah.

Assembly constituency hrang hrang MLA-te chu ṭangho a, convener insiam a, ṭhutkhawm fo ṭha a tih thu sawiin Lalrinpuii chuan, "Bial fan nikhua pawhin HIV awareness neih dan kawng dap zel ang u," a ti.

HIV/AIDS-a Mizoram dinhmun sawifiahtu Dr Jane Rinsangi Ralte, MSACS project director chuan, MLA zawng zawngin HIV+ve zinga rethei zualte a ṭul anga puihna tur Rs 50,000 ṭheuh an thawh chu damlo inenkawl nan leh ART la tura kalna senso atan ṭangkai taka hman a nih thu a sawi.

Dr Jane Rinsangi Ralte chuan, National AIDS Control Organisation-in HIV/AIDS do dan kalphung thar a duan, Mobilization for AIDS Suraksha (MAS) tihhlawhtlin a nih ngei theih nan nasa lehzuala ṭan la turin MLA-te a ngen bawk.

Ṭhutkhawmah hian MLA-te leh MSACS-a thawkte'n HIV/AIDS-a Mizoram dinhmun an sawiho a, MLA-te'n zawhna an neihte chu official-te'n an chháng.

MSACS chhinchhiah danin, October 1990 aṭanga June 2026 thlengin Mizoramah HIV vei mi 34,745 hmuh chhuah a ni tawh a, India ramah Mizoram chu mihring cheng zat aṭanga chhuta HIV hluar berna a ni a, mihring cheng zat aṭanga 2.85% chu HIV+ve an ni.

MAS TARGET - 95:95:95

☑ 1st 95: HIV vei rinhlelhawma ngaih zinga 95% talin an vei leh vei loh an hre tur a ni.

☑ 2nd 95: HIV+ve hmuh chhuah tawh zinga 95% talin ART damdawi an ei tur a ni.

☑ 3rd 95: HIV+ve ART damdawi ei zinga 95% tal damdawi-in natna a thunun tur a ni.