Poshan Maah leh Project Genesis hawng

Social Welfare, Women & Child Development (SWWCD) minister Lalrinpuii chuan nimin khan Dawrpui Multipurpose Hall-ah Poshan Maah leh Project Genesis: Protein-rich Food Campaign a hawng.

SWWCD Minister chuan, kum 2015 aṭanga Beti Bachao Beti Padhao (BBBP) hnuaiah kum tina hmeichhiate hriselna lam hawia hmalakna kalpui ṭhin chu kuminah pawh Project Genesis tih hmingin nausen hmei-chhiate humhimna lam hawia kalpui a nih dawn thu a sawi.

BBBP leh Health department chuan hemi atan hian nau paite chu damdawi-inah inentir vek a, nau pawh damdawi-inah ngei hring turin an duh tih sawiin Lalrinpuii chuan, "Mizoramah chuan Lunglei, Siaha, Lawngtlai leh Mamit district-ah te damdawi-ina nau hring hi 70-80% vel a la ni a, a chhan hrang hrang zingah inkalpawhna ṭha tâwk lo te, damdawi-in hnaivai awm remchang lo te, khawsak harsat vang leh awareness la ṭhat tâwk loh vangte a ni," a ti.

Minister chuan, damdawi-ina nau hrin theih loh chhan harsatnate tiziaawm a, hmasawnna chak zawk a thlen beiseiin sorkarin Project Genesis a kalpui tih sawiin, "Project-Genesis hian a tum berte chu - nau pai tih hriat ruala inchhinchhiah nghal a, 1st trimester ANC registration 1% tala tihpun leh, damdawi-in ngeia nau neih 95% aia tlem lo thlentir a ni," a ti a; Project-in a tum tihlawhtling turin ASHA, anganwadi worker, health worker, VC leh tlawmngai pawlte ṭan la turin a ngen.

Rashtriya Poshan Maah (National Nutrition Month) hi a vawi kuana niin, September thla chhunga kalpui tur a ni a, thupui chu 'Hamari anganwadi, hamari jimmedari' (Kan anganwadi, kan mawhphurhna) tih niin, thupui ṭhen têt (sub-theme) panga a awm.

Inkhawm hi WCD director Zoramthangi Chhangte-in a kaihruai a; deputy director Flora Lalṭanpuii'n Project Genesis kalpui tura ruahmanna leh hmalaknate a tarlang. Ei tur hrisel siam dan a takin entir a ni bawk.