Ruihhlo do turin chhungkaw tin kan ṭan rual a ngai - Sawivunga

Minister C Lalsawivunga chuan, ruih theih thilin Mizo hnam a rûn avangin ruih theih thil hrang hrangte do turin chhungkaw tin an ṭan rual a ngaih thu a sawi.

C Lalsawivunga hian nimin khan a pisaah TC Vanlalzauva siam, 'Who are you going to be?' (Eng mi nge i la nih dawn?) tih film a tlangzarh. Thu sawiin Minister chuan, "Ruihhlo leh zuin kan hnam a rûn a, chhungkua min tichhia a, hemi do tur hian chhung tin kan ṭan rual a ngai a ni,” a ti.

Art & Culture Minister chuan, "Kan hnam kal zel tur hian vên a mamawh ta em em a, chutiang laka chhungkaw tin min zirtir thei tur leh Mizo nun zia phawk chhuak thei film thar a lo awm leh ta hi lawmawm ka ti a, Zo fate tan hlawk taka thawk turin ka beisei a ni," a ti bawk.

'Who are you going to be?' tih film-ah hian ruihhlo vanga Mizote rûmna tarlan a nih rualin, ruihhlo laka ṭhalaite himna tura kohhran leh mi tinte mawhphurhna lam hawi tarlan a ni a; film siamna senso chu Art & Culture department hnuaia Tribal Research Institute-in an tum a ni.