World Suicide Prevention Day hmang

Nimin kha mahni intihhlum vènna ní, World Suicide Prevention Day a ni a; Mizoram State Legal Services Authority leh National Mental Health Programme chuan Chanmari YMA Hall-ah zirlaite nen an hmang a, Gauhati High Court judge Justice Nel-son Sailo-in a hmanpui.

Justice Nelson Sailo chuan, mahni intihhlum ṭhin chhan tam tak chu ngaihsaktu nei loa inhriat vang a nih ṭhin thu a sawi a; mi dangte harsatna hriatpui a pawimawh thu sawiin, "India ramah mahni intihlum tam berna chu Andaman & Nicobar Island a ni a, mi 1,00,000 zelah mi 49.6 intihlum an awm a, mi nuai 13 vel awmna Mizoramah chuan mi 1,00,000 zelah mi 12.14 intihlum an awm ang a ni," a ti.

Mahni intihhlum chhan zingah chhungkaw buaina, inngaihzawnna thil, ruih theih thil, hna thawh tur neih loh, retheihna leh rilru lam harsatna te chu a langsar zual a nih thu sawiin Nelson Sailo chuan, "Pathianin mihringte hi common sense min pe vek a, kan bula awmte awm dan leh anmahnia danglamna awmte kan chîk ṭhin a pawimawh. Harsatna nei nia kan hriatte chu sawipui theih dan kawng kan zawn a ngai," a ti a; harsatna nei nia langte chu thlahtlam lo turin kal khawmte a chah.

Khualzahawm Justice Kaushik Goswami, Gauhati High Court judge pawhin, rilru lama harsatna leh buaina nei nia langte be hmasatu nih tum turin zirlaite a fuih.

NHM mission director Dr Lalchhuanawma pawhin thu sawiin, "Mizorama intihhlumna thleng ṭhin hi ngaihthah thiang a ni lo a, a tuate pawh mai hian kan chhehvelah beng kan chhit a, mit kan lên reng a hun tawh," a ti. School Education director Angela Zothanpuii'n thu a sawi bawk.

Kumina World Suicide Prevention Day thupui chu 'Changing the narrative on suicide' tih a ni a, inkhawm hi NPPCD & NPPC state consultant Dr Lalthanmawii Khalthang-in a kaihruai. Zirlaite'n mahni intihhlumna thleng ṭhin veng tur leh mahni intihlum lo tura intiamna thu an sawi rual a ni.

High school/higher secondary school 19 leh college paruk aṭangin zirlai telte tan mahni intihhlum ven dan sawia intihsiakna buatsaih a ni. School level-ah pakhatna Emmanuel Lalhlimpuii, Staines Memorial School, pahnihna Hannah Malsawmkimi, CLS Academy leh pathumna Lalngaihawmi, Providence HSS te an ni a; college level-ah pakhatna Zorinpuii, Aizawl College, pahnihna Lalruatsanga, MCON leh pathumna Lalnunpuii, Aizawl West College te an ni.

Mahni intihhlum leh a kaihhnawiha harsatna neite tan TeleMANAS helpline number 14416 leh 18008914416-ah englai pawha biak theih a ni a, ARDSI Mizoram Helpline 7005983633 leh 9366191341-ah te pawh theih reng a ni bawk tih tarlan a ni.

Economics & Statistics Directorate-in Handbook a tihchhuah hnuhnung ber, Mizoram Statistical Handbook, 2024-in a tarlan danin, kum 2024 khan Mizoramah mahni intihlum mi 96 an awm a, mipa 82 leh hmeichhia 14 an ni a, Aizawl district-ah mahni intihlum an tam ber.