KHAWTHLIR

Teak rutute man

Environment, Forests & Climate Change department, Kanhmun Range-a thawkte chuan September 9, Nilaini khan Mamit district chhung, Luimawi leh Goboi inkara Government Plantation-a teak rutu mi pahnih an man a, nimin khan court-ah hruai niin, Mamit District Jail-ah dah an ni.

Lirthei lian tan tlan rem rih lo

Traffic SP C Vanlalvena chuan hriattirna chhuahin, Bawngkawn Hmarveng (Helipad chhak) aṭanga Zuangtui panna kawngah lungrem chim a awm avangin 407 truck leh a aia liam lirtheite tlan phal a nih rih loh thu a tarlang. "Ruah a tlak tam avangin September thla chhungin pick-up leh a tlukpui bungraw phur/load la rêng rêng tlan phal a ni lo," a ti bawk.

Sangha no sem

Fisheries department leh ICAR-CIFA, Bhubaneswar ṭang dun chuan nimin khan Khawzawl District Fisheries Development Officer pisaah sangha khawitu mi 100-te tan sangha no (Amur carp) an sem. District bawrhsap K Vanlalṭhiana'n a hmanpui a, taima taka hna thawk a, sangha no an dawnte enkawl puitling ngei turin sangha khawitute a chah.

'Laklawh' tih tur

September 9, Nilainia YMA Coordination Committee ṭhukhawmin an rêl, tuai leh patil tihreh dan emaw, a tihtlem dan emaw chungchanga 'Mi laktlaklo' tih chu 'Mi laklawh' tih tur a ni a; meeting minute-a inziak lâk chhâwnnaah tihsual palh a nih thu Central YMA lam chuan Vanglaini an hrilh.

Barak lui sawiho

Serchhip leh Khawzawlah nimin khan district hotute kaihhruaiin 'Conservation & Restoration of Catchment Areas of Barak River in the States of Assam, Manipur, Mizoram and Nagaland' chungchang sawiho a ni. Barak lui fintu leh a pêngte humhalh leh siamṭhat dan tur rêl a ni a; October 12-16, 2026 chhungin hna thawktu tur NERCORMS official-te field inspection nei turin Mizoramah an rawn kal dawn tih tarlan a ni.