Excise dept. leh an thawhpuite'n Sapzu 5,004 leh beer 7,920 man

Excise & Narcotics department (END) leh Kolasib Venglai East Branch YMA thawk dun chuan September 9, Nilaini zan dar 10 vel khan Kolasib Venglai East-ah sapzu ûm 1,800 an man a; END chuan nimin khan Zemabawk dáia Bûng Banglaah sap zu ûm 3,204 an man bawk.

END tarlan danin, September 9, Nilaini zan dar 10 vel khan Kolasib Venglai East-a NH-306 kawngpuiah truck AS-11 E-4260 aṭangin sapzu (India siam - IMFL) ûm puitling 1,800 leh beer (ml 500) bûr (can) 1,200 an man a, Assam aṭanga phurh luh a ni. Truck-a chuang mi pahnih - Parul Hussain Laskar (24), Rajnagar, Bagha Bazar leh Saruk Ahmed Bharbuiya (26), Satyagaram, Bagha Bazar, Cachar district, Assam ve ve an man nghal.

END enforcement team chuan nimin zing dar 3 vel khan Zemabawk dáia Bung Bunga Vengah truck pakhat aṭangin sapzu ûm puitling 3,204 leh beer (ml. 500) bûr 6,720 an man a ni.

Excise & Narcotics department hian kumin January 1 aṭanga nimin thleng khan sapzu litre 21,660.035 leh beer litre 32,969.280 an man a; heroin kg 18.489, methamphetamine kg 68.138 leh crystal meth kg 11.531 an man bawk.

EXCISE-IN 2026-A AN MAN TAWHTE

(Zu leh a kaihhnawih)

Rakzu Lt. 50,592.024

Zu bilh lai Ṭîn 1,18,950

Sapzu (IMFL) Lt. 21,660.035

Sapzu (FML) Lt. 52.600

Burma zu (BEDC) Lt. 2,555.210

Beer Lt. 32,969.280

Heroin Kg. 18.489

Methamphetamine Kg. 68.138

Crystal Meth Kg. 11.531

Ganja Kg. 145.926

Khuh damdawi Búr 8,554

Damdawi dang Mûm 48,109