MCC-in Green Commute Day an hmang

Mizoram Christian College (MCC) chuan nimin khan Internal Quality Assurance Cell (IQAC) huaihawtin Green Commute Day (Boruak venhimna atana kea kal ní) an hmang a; lirthei hmang loin a huhoin kein college-ah an kal.

Green Commute Day an hmannaah hian MCC-a zirlaite leh thawktute chu hmun pali Chanmari kâwn, Israel Point, Aizawl Temple leh Synod Office kawtah an innghak khawm a, a huhoin kein college an pan a ni.

College an panna kawngah hian leilung leh a chhunga awmte veng him tur leh boruak chhia tihtlem turin ṭan lak a ṭulzia te, lirthei tâwt leh traffic jam tihtlem a ṭulzia te, taksa leh rilru hriselna atan kea kal tam a ṭulziate tarlanna thuziak an keng.

MCC-a zirlaite leh thawktute chuan college an kalna leh hawnaah ni tin college bus leh lirthei dang 160 chuang an hmang ṭhin a, chung lirtheite ni khata tlan thui zawng belhkhawm chu km. 1,862 anga chhût a ni. Green Commute Day puala lirthei keng loa kea an kal avang hian bus leh lirthei dangte'n km. 1,862 tlanna atana an hman diesel leh petrol man Rs 5,850 an hum (save) angin an chhût bawk.

College an thlen hnuah Synos HSS Hall-ah Green Commute Day khârna hun an hmang a; thusawitu MCC principal Dr Tawnenga chuan, khawvel ram tam takah mi tam takin nasa takin khawlum an tuar tih sawiin, "Mizoramah pawh khawlum zel te, lirthei kan hmang nasa lutuk tihtlem a ṭulzia te, boruak chhe zel tur ven him a ṭulziate kan hriat chian a ngai," a ti. Leilung, thing leh mau leh nungchate humhalh a, veng him tura mi dangte kawhhmuhtu ni zel turin zirlaite a chah.

MCC IQAC coordinator Vanlalpeka, assistant professor chuan, Green Commute Day chu kum tin hman an tum thu a sawi bawk.