Mizorama filling station neitute'n pawisa chhuhsak luiah MZP an puh; 'Kan inkhawmpui atan an rawn thawh' - MZP

Mizorama filling station (petrol pump) neitute pawl, All Mizoram Petroleum Dealers Association (AMPEDA) chuan, an member ṭhenkhatte hnathawk (hnam dang)-te chu MZP-in tihluihna hmangin pawisa an chhuh tih an tarlang. MZP erawh chuan, tihluihna tel loin an pawl inkhawmpui atan pawisa an thawh zawk niin an tarlang thung.

AMPEDA chuan nimin khan thuchhuah siamin, an pawl member ṭhenkhat filling station-a thawk, pump manager-te chu MZP-in an pisaah hréngin, tihluihnain September 7, 2026 khan an bank account no. 10763514287 (SBI Main Branch)-ah Rs 2,00,000 an thun (transfer)-tir tih an tarlang a, "Pump ṭhenkhatah cheng nuai 1.2 account no. 10763514287-ah hian transfer turin an ti mek a ni," an ti.

MZP thil tih dan chu ṭha lo an tih thu sawiin AMPEDA chuan, "A tawp thlengin kan do zel dawn," an ti a, pawisa an lak tawhte September 16, 2026 ral hmaa pe kîr tur leh pawisa pe tura an tih mekte an hriattirna hnûk kîr turin MZP an phût.

AMPEDA chuan, MZP-in pawisa an lak tawhte September 16, 2026 ral hmaa an pe lêt lo a, pawisa pe tura an tihte an hnûk kír lo a nih chuan September 17, 2026 aṭangin tiam chin awm loin Mizorama petrol pump zawng zawng an khâr dawn tih an puang bawk.

MZP pawhin nimin khan thuchhuah siam nghalin, AMPEDA thuchhuah chungchang an sawifiah a, "September 23-25, 2026 hian Darlawnah inkhawmpui kan hmang dawn a, chumi atan chuan LT Brothers Filling Station, Keifang chuan sum an rawn thawh a, tihluihna leh kut inthlakna pakhat mah a awm lo," an ti.

LT Brothers Filling Station hi Lalthanzauva ta ni ṭhin, Sandeep, Haryana hnenah hralhin, pawisa an inhlan vek tawh tih hriat a nih thu tarlangin MZP chuan, "Tunah hian a enkawl tur hian manager atan Nitesh-a an hmang mek," an ti a; Mizorama petrol pump tam tak chu a hmun leh license Mizo ni si, hnam dang (vai) neitu nihna nei tam tak a awm niin an tarlang.

MZP chuan, Mizote hian hnam dang nena inrem siamin sum tam tak hlawhin an ram leh license an hmantir nasa niin an sawi a, "Hnam dang, Mizo hming hawha petrol pump neite hi kan hre vek a, political party-a inhmang tak takte pawh an awm a, MZP chuan a ṭul angin hengte hi en zuiin hma a la zel dawn. Kan inkhawmpuiah pawh Mizo mahni hming hawha sumdawntirte chungchang hi kan ngaihtuah dawn," an ti.

Hnam dang thlavang hauh leh thurualpuitute vanga AMPEDA-in petrol pump an khâr chhungin hnam dang sumdawntir ve lo petrol pump neitu Mizote chu inkhâr ve lo tura an ngen thu tarlangin MZP chuan, "Mipui pawh heng hnam dang sumdawntirtute hi hnualsuat a, dàwr chhunzawm lo ngam turin kan ngen," an ti a; sorkar pawh dan dik loa sumdawngte dap chhuak a, an sumdawn phalna titawp turin an ngen nghal tih an tarlang bawk.