VBYLD 2027-a tel turin ṭhalaite sáwm

NSS leh My Bharat hotute chuan nimin khan Aizawl Press Club-ah thuthar thehdarhtute an kâwm a; sorkar laipuia Ministry of Youth Affairs & Sports-in Viksit Bharat Young Leaders Dialogue (VBYLD) 2027 a buatsaih leh dawn thu sawiin, tel turin Mizo ṭhalaite an sáwm.

State NSS Cell officer Prof. Lalrinmawia chuan, VBYLD-ah My Bharat portal hmangin ṭhalaite tan ram siamna kawnga an hmachhawp leh ngaihtuahna an neihte au chhuahpui theih a nih thu a sawi a, "VBYLD 2026-ah khan ram pum aṭangin ṭhalai nuai 50 chuangin MYBharat leh MYGov platform hmangin Viksit Bharat Quiz an chháng a, a ti ṭha zual ṭhalai 3,000 vel chu Viksit Bharat Young Leaders Dialogue 2026-ah an tel," a ti.

VBYLD 2027-ah hian ṭhalai kum 15-29 inkar an tel theih thu sawiin Prof. Lalrinawma chuan, "VBYLD-a tel tur hian inelna hrang hrang - quiz, essay leh a dangte paltlang a ngai a; stage 1-ah quiz niin, hemi atan hian September 30, 2026 thleng thehluh theih a ni," a ti a; MYBharat leh MYGov portal-ah dilna theh luh theih a nih thu a sawi.

Prof. Lalrinawma chuan, VBYLD 2027 atan hian college leh higher secondary school hrang hrangah hma an la tawh tih sawiin, "Mizoram aṭangin mi 3,600 chuang an tel tawh. Mizoramah NSS volunteer 30,100 kan nei a, hemi zat hi tel turin sorkar laipuiin min beisei," a ti a; Mizoram ṭhalai ṭhalai kum 15-29 inkarte chu tel vel turin a sáwm a ni.