Tender chhànna hniam ber chungchang thubuai Gauhati High Court-in a titawp

Gauhati High Court Aizawl Bench chuan, sorkar tender chhuaha chhànna hniam ber chungchangah September 9, Nilaini khan thutlukna a siam a; tender chháng hniam ber pakhat aia tam an awm a, hna thawktu tur thlan dan turah sorkarin kaihhruaina a siam avangin thubuai a titawp.

Thu dawn danin, July 2024 khan Mizoram sorkar chuan tender chhan dan chungchangah notification a chhuah a; tender chhànna rate chu estimated cost 5% aia hniam lo leh 10% aia sang lo turin a ti. Finance department-in September 2025-ah Standard Bidding Documents a tichhuak leh a, tender chháng hniam ber zinga hna thawktu tur thlan dan tur chu thuneitute kutah dah.

Sorkar thuchhuakah hian inkaih-hruaina langtlang tak a awm lo nia hriain Vanlalruata Sailo chuan 2026 kum tìr lam khan Gauhati High Court-ah public interest litigation (PIL) a thehlut a ni.

Tender chháng hniam berte (chhanna hniam ber inang) aṭanga hna thawktu tur thlan dan turah hian Mizoram sorkar chuan August 19, 2026 khan kaihhruaina a siam a; chu kaihhruaina chu High Court chuan ṭha tâwkah ngaiin a pawmpui a ni.

Finance department-in August 19, 2026-a notification a chhuah dan chuan, tender chhang hniam ber contractor pakhat aia tam an awm chuan, hna an lo thawh tawh dan te, thubuai an neih dan te, khawl leh hmanrua an neih dan te, thawktu an neih dan leh sum an neih dante endik tura tih a ni.

He thubuaia an buaina ber Mizoram sorkarin a chinfel tâk avangin High Court chuan thubuai chu September 9, 2026 khan a titawp a, thupek lailawk a lo chhuah tawhte pawh a titawp nghal bawk.