Dept tam tak hi thawktu tlem vanga tluchhe mai thei an ni - Chief Minister

Chief minister Lalduhoma hoin nimin khan CMO conference hall-ah Irrigation & Water Resources (IWR) department thuam chak dan tur sawiho a ni a; CM chuan, sorkar department tam tak chu thawktu tlem vanga tluchhe maithei an nih hlawm thu a sawi.

CM Lalduhoma chuan, department tam tak chu thawktu indaih lo, kum rei tak chhung a ngai renga kal tawh an nih thu a sawi a, "Thawktu tlem vanga tluchhe mai thei an ni hlawm. IWR department pawh kum 19 kal taa in dinhmun ngai rengah khan in la awm a, hmalakna in ngah bawk si. Department dangte dinhmun hre reng chungin an harsatnate kan ngaithla hmasa a ni," a ti.

IWR chief engineer K Hamlet-a chuan, an department thuam ṭhatna tura ruahmanna an siamte a sawifiah a, a bawhzui dan tur sawiho nghal a ni.

IWR department hi tun hma chuan Minor Irrigation tih ṭhin a ni a, tunah chuan irrigation development chauh ni loin, River Basin Planning, Springshed Development, Integrated Water Resources Management, Hydrological Data Management, Flood Management & Warning, Multipurpose Reservior leh Ground Water Development thlenga a thawh tak avangin project lian tak tak a khawih mek.

Sawihonaah hian IWR minister PC Vanlalruata, GAD, DPAR, Finance leh IWR department hotute an tel.