Smart meter/bill complaint 1,052 a lut tawh; Bill sang leh meter kal chak nia sawi a tam
Power & Electricity department chuan consumer 82,588 hnenah smart meter an vuah tawh a; smart meter leh electric bill-a harsatna neite chinfel rûnpui September 7, 2026 aṭanga neihah nimin thleng khan complaint 1,052 a lut. Complaint lut zingah bill sang leh meter vir/kal chak nia sawi an tam.
Vanglaini palai zawhna chhangin PE department hotute chuan, smart meter 82,351 vuah a nih tawh thu an sawi a, "Complaint rûnpui hi September 7-10, 2026 chhung neih tur a ni a, ni thum chhungin complaint 1,052 dawn a ni a, 833 chinfel tawh a ni. Complaint rûnpui zawh huna a hmuna endik chhunzawm tur 209 a awm tawh," an ti a; complaint lut zat chu smart meter vuah tawh zat aṭangin 1.27% a nih thu an sawi.
PE department hotute chuan, complaint an dawn zingah bill sang leh meter vir/kal chak nia sawi an tam tih an sawi a, "Smart meter hman dawn chuan meter hluia bill kal dan (June thla bill August-a pek) ang kha thlak a ngai a, smart meter-ah chuan tun thla bill thla leha pek nghal (June thla bill July-a pek) tur a ni. Smart meter vuah tirh hian an bill hmasa siam ni hnuhnung ber aṭanga bill thar siam ni inkar (bill cycle) chhung zau an awm a, kan lo hrilhfiah a, an hrethiam ve zel," an ti.
Meter vir/kal chak nia sawite chu department meter emaw, consumer-te meter hlui emaw leh smart meter an vuah lai chu an zawm (connect) a, kawlphetha kal zat (KwH) endik ṭhin a nih thu sawiin PE hotute chuan, "Complaint rûnpui hawn hma khan hetiang hian eng emaw zat kan ti tawh a, KwH inang lo a la awm lo. Tuna complaint rûnpuiah chuan hetiang complaint-te hi kan la tihtir rih lo a, complaint zawh kan nghak," an ti. Meter hluiah chiang lo tam tak a awm thu leh, smart meter-ah dik zawka bill kal vanga bill san phah an awm nual niin an sawi.
PE department hotute chuan, meter hluiah meter kal dan timuang tura thîr hîp thei (magnet) hmanga khawih danglam an awm ṭhin thu sawiin, "Smart meter-ah chuan khawih danglam tumte smart meter kaltlangin computer-ah a lang thei vek a, magnet hmanga smart meter khawih danglam tum hian kawlphetha unit a tikal chak zawk a, bill san phah leh rawn complaint an awm," an ti.
Smart meter chu a lothlâwna kawlphetha kal ral tur vên nan leh dik lo taka kawlphetha pawt ru emaw, khawih danglam tumte venna hmanraw ṭha a nih thu leh, engtiklai pawhin complaint an dawn theih thu PE hotute chuan an sawi a; in chhunga electric kal dan leh hman dan chîk ṭhin a ṭul thu leh, wire, plug, switch, etc -te a hlui tawh chuan a thara thlak ṭhin a ṭhat thu an sawi bawk.
SMART METER-A HARSATNA CHINFEL RÛNPUI
☑ Aizawlah smart meter 82,588 vuah a ni tawh.
☑ Aizawlah September 7-10, 2026 chhungin complaint center 21-ah sawisel hun hawn a ni.
☑ September 7-9 chhungin sawiselna 1,052 a lut a; 833 chinfel niin, a hmuna enfiah tura tih 209 a awm.
☑ Complaint rûnpui tawp hnuah pawh complaint theih reng a ni.
☑ Customer Care Center-ah zing dar 6 aṭanga zar dar 10 chhungin phone number 0389-2322174 leh 0389-2310169 bakah, Whatsapp hmangin 6009192434 leh 8132801559-ah thlen theih a ni.