International Literacy Day hman a ni

Nimin September 8 kha International Literacy Day vawi 60-na a ni a, School Education directorate conference hall-ah hman niin, School Education secretary K Lalthawmmawia khuallian a ni. Khuallian hian ULLAS-RAERIP Worksheet, Skill Training Programme 2026-2027 leh 220 Schools Go Live te a tlangzarh.

Sorkar thuchhuah tarlan danin, sorkar laipui hmalaknaa Periodic Labour Force Survey Annual Report 2023-2024 ah Mizorama ziak leh chhiar thiam zat chu 98.2% a ni a, Mizoram chu India rama ziak leh chhiar thiam vek (fully literate state)-ah May 20, 2025 khan chief minister Lalduhoma'n a puang. A hnua Ministry of Statistics and Programme Implementation hmalakna Periodic Labour Force Survey Annual Report 2025-26 ah Mizoram literacy rate chu 99.8% a ni.

Tuna Mizorama puitling ziak leh chhiar thiam lo la awmte chu kum 2027-a India ram chhiarpuiah in tin luhchhuaha survey neih a nih hunah chuan thiamtir vek an nih theih nan theihtawp chhuah mek a nih thu sorkar thuchhuahin a tarlang.

K Lalthawmmawia chuan, ziak leh chhiar thiamah Mizoramin chakna thurûk - tlawmngaihna, mi dangte tana inpekna leh khawtlang mipui thawhhona ṭha a nei tih sawiin, "Heng hi kan hmalakna leh hma kan sawn zel theih nana kan innghahna lungphûm pawimawh a ni. State dangte chuan sum leh pai, budget sang tak tak an nei a ni thei, keini chuan sumin a lei theih loh ro hlu kan nei a ni," a ti.

Ziak leh chhiar thiam tamna chuan leilung humhalh a pawimawhzia a keng tel ngei tur a ni tih sawiin Education Secretary chuan, "Eizawnna leh hmasawnna kawnga min hruai thei tur thiamthil dang chi hrang hrang digital literacy, vocational skill leh mi dangte nena khawsakho dante min zirtir tel tur a ni," a ti a; Mizoram chu fully literate state ni tawh mah se, hmabakah tih tur tam tak a la neih thu a sawi.

Literacy Day hmanna inkhawm hi School Education director Angela Zothanpuii'n a kaihruai a, Aizawl East SDEO Dr Lalhruaitluangi'n School Education Minister thuchah a chhiar. School Education sirectorate leh secretariat-a thawk te, MBSE, SCERT leh Samagra Shiksha-a officer te, zirtirtu pawl hruaitute leh Skill Training Model Centre-a thawkte an tel.

UNESCO chuan October 26, 1966 khan kum tin September 8-ah International Literacy Day hman a rêl a, kum 1967 khan hman ṭan a ni.