Aizawl City Branch Fai Inelna 2026; Aizawla veng fai dan endik ṭan a ni

UDPA department, Central YMA, Aizawl Municipal Corporation leh Aizawl Smart City Ltd ten YMA, Aizawl city branch-te tana kumina veng fai inelna an buatsaih mekah nimin khan endiktute'n veng fai dan an endik ṭan.

Aizawl City Branch Fai Inelna 2026-ah hian endiktute chu - Save The Riparian hruaitu Romalsawma Hmar, Vanglaini joint editor leh MJA general secretary K Zothanpara leh, environmentalist Dr Gospel Lallawmzuali te an ni.

Endiktute hian nimin zing khan Laipuitlang Branch endik hmasa berin, Chaltlang Branch leh Chaltlang Lily Veng Branch te an endik. CYMA-in a enkawl YMA branch (Aizawl city branch) 111 an endik dawn a; chung zingah chuan AMC pawn lam - hmar lamah Sihphir leh Nausel thlengin, khawchhak lamah Airfield Branch thleng, khawthlang lamah Lengpui thleng leh, chhim lamah Lungleng thlengin a ni.

Aizawla YMA branch-te fainaa an intihsiaknaah hian endiktute'n branchi tinte chu vawi hnih an endik dawn. Endik thawh khatna September - December 2026 chhungin veng chhung hmun hrang hrang an en dawn bakah, YMA branch hruaitute faina atana hma an lak dan an zawt zel dawn. Endik thawh hnihna erawh chu 'surprise visit' niin, January - March 2027 chhungin a rûkin an endik dawn a ni.

Aizawl City Branch Fai Inelna 2026-a lawmman tur chu - pakhatna Rs 3,00,000, pahnihna Rs 2,00,000 leh pathumna Rs 1,00,000 a ni a; a ti ṭha zual, top 10-a langte hnenah Rs 50,000 ṭheuh pek a ni bawk ang.