Zirtirtu ṭha chawimawina dawngtu Lalnunmawii, Lunglei Electric Veng

Electric Veng High School, Lungleia head-mistress Lalnunmawii, Lunglei Electric Veng chuan September 5, Teachers' Day khan India rama zirtirtu ṭha chawi-mawina, National Teacher Award 2026 a dawng.

Sorkar laipuia Ministry of Education chuan ram chhung state leh union territory hrang hrang aṭangin kumina zirtirtu ṭha chawimawina, National Teacher Award dawng turin mi 48 a thlang a; chu'ng zingah chuan Lalnunmawii pawh a tel a ni.

National Teacher Award hlanna inkhawm hi Zirtirtute Ni khan Vigyan Bhawan, New Delhi-ah buatsaih a ni a; chawimawina dawngtute hnenah President Droupadi Murmu-i'n award a hlan a ni. Award hian medal, thuchei leh Rs 50,000 a keng.

Lalnunmawii w/o H Lianzama hi Lunglei Electric Venga pianga seilian a ni a, fa panga an nei. Lunglei College aṭangin BSc (Mathematics) a zo a, sorkara a luh hmain private school-ah a thawk nual hman.

Kum 2011-ah contract-in sorkarah a lut a, kum 2017-ah a nghet a; kum 2023 khan Limited Departmental Examina-tion hmachhawnin, headmaster ni turin a inziak tling. Sorkara a luh hnuah Electric Veng H/S-a a thawh hma hian Leitlangpui H/S-ah a thawk a ni.

Mizoram hruaitu eng emaw zatin Lalnunmawii an lawmpui thu an tarlang a; larsap Gen. Vijay Kumar Singh chuan, Lalnunmawii chu Mizoram tana mi chhuanawm bik a nih thu sawiin, inpekna thûk tak nen thawk zui zel turin duhsakna a hlan.

Chief minister Lalduhoma chuan, Lalnunmawii chu mithiam tam tak chher chhuak tawhtu a nih thu sawiin, "Naupangte'n an zirna piah lama an mamawh dang chena ngaihtuahsak a, ṭanpui peih zel mi, zirtirtu entawn tlak, rawngbawlna a ni tih hre chunga hna thawk ṭhin a ni a, he lawmman hi a phu hliah hliah a ni," a ti.