ADB aṭangin sum dawn a la ni lo; Kuminah vbc 21.60 tal dawn beisei

Mizoram sorkarin Mizoram Universal Health Care Scheme (MUHCS) atana Asian Development Bank (ADB) aṭanga loan a pûk tur US dollar nuai 1,080 (cheng vbc 980 vel) aṭangin sum dawn a la nei lo a, kuminah a tlem berah cheng vbc 21.60 dawn hman beisei a ni.

Vanglaini palai zawhna chhangin Finance department hotute chuan, ADB loan pûk turin inremna tihfel ni tawh mah se, sum dawn a la nih loh thu an sawi a, "Tihhlawhtlin tur (disbursement linked indicator) hrang hrang a awm a, chumi kan tihhlawhtlin hunah zel pawisa kan dil ṭhin dawn," an ti.

Finance department hotute sawi danin, disbursement linked indicator (DLI) pahnih chu tihhlawhtlin tawha ngaih a nih avangin ADB-ah pawisa dil a ni a, pakhat zawkah tih tel tura duh ADB-in an neih avangin an ti ṭha leh a, an peih tawh.

Finance hmalakna chu ADB-in endiktu - independent verification cagency (IVA) atana an ruat Prof. James LT Thanga, Mizoram Universuty-in a endik a, ṭha tâwka ngaih a nih chuan ADB-ah pawisa dil leh a ni ang. ADB-in tihhlawhtlin tura an tih pahnih, tihhlawhtlin tâk hmang hian cheng vbc 10.8 ve ve, a vaiin cheng vbc 21.60 dil theih a ni.

DLI hi chi hrang pariatah ṭhen a ni a, ṭhenkhatah chuan A, B leh C-ah ṭhen niin, a vaiin 14 a ni. Tihhlawhtlin hun chhung tur leh tihhlawhtlin huna dil theih zat bituk a awm. Kuminah hian a tlem berah cheng vbc 21.60 hmuh hman beisei a ni a, a aia tam pawh hmuh hman a ni maithei.

DLI tihhlawhtlin tur chu a hmasa berah pahnih a ni a, tihhlawhtlin a ni tawh. A dangte chu kum 2026 atan pasarih, kum 2027 atan paruk, kum 2028 atan pathum, kum 2029 atan pakhat leh kum 2030 atan pathum a ni. Hengte hi tihhlawhtlin vek a nih hunah ADB loan puk tur US dollar nuai 1,080 hmuh kim a ni ang.

Finance deparment hotute chuan, ADB aṭanga sum an hmuh apiang chu MUHCS Corpus Fund-ah dah zel a nih dawn thu sawiin, "Kan hmuh kim hunah chuan nasa takin sorkar tan corpus fund atana sum dah tur a tlakhniam phah ang," an ti.