November-ah Leitlangpui Music Festival buatsaih dawn
Leitlangpui Music Festival 2026 hman dan tur ngaihtuahin nimin khan Tourism minister Lalnghinglova Hmar pisaah Organising Committee an ṭhu a; Minister-in kaihruaiin, kumina Leitlangpui Music Festival chu November 11-13 chhungin buatsaih an rêl.
Leitlangpui Music Festival 2026 Organising Committee-ah hian Tourism department hotute bakah Home, PWD, Power and Electricity, Public Health Engineering, Health & Family Welfare, Commerce & Industries, Art & Culture leh IPRPS department aiawhte an tel a; inbuatsaihna kalpui dan tur sawiho a ni.
Ruahman dan chuan, November 11-13, 2026 chhungin Leitlangpui Music Festival buatsaih a ni dawn a; a nghahna hmun tur chu Lunglei High Powered Committee vice chairman V Malsawmtluanga, MLA hoa ngaih-tuah tura dah a ni.
Minister Lalnghinglova Hmar chuan, Leitlangpui Music Festival chu vawi thum buatsaihna tur a nih thu a sawi a, "Festival hmasa pahnihah hmasawnna tam tak hmuh tur a awm a, a vawi hnihna, nikumah phei chuan Mizoram páwn aṭangin rock band an rawn tel hial a, phai lam media-te beng pawh thlengin, Mizoram hming a ri ring hle a ni," a ti.
Festival lian tham buatsaih a hautak thu sawiin Lalnghinglova chuan, "Mizoram pum huap a nih avangin Tourism department mai ni lo, department hrang hrangte Organising Committee-ah an tel a, phûr taka kan thawkho ṭhin hian he Festival hlutna hi a pho lang a ni," a ti bawk.