Vanduaina thlengah mi 2 an thi

Nimin khan Khawhai leh Thenzawla vanduaina thlengah mi pahnih - Lalhriatzuali leh Dennis Vanbawih Thawng te an thi.

Nimin chhun dar 12 pelh khan Khawihaiah Ngur­khuma te in a kâng a, an tunu Lalhriatzuali (21) d/o H Zonunsangi a kâng hlum. Thu dawn danin, inah hian mi pali an khawsa a, a kan lai hian Lalhriatzuali chiah a awm.

In a kâng tih hriat a nih veleh ṭhelh tuma beih a ni a, a kan ral hmain ṭhelh mih a ni. Lalhriatzuali erawh a kâng hlum a, khuma puana intuamin hmuh a ni. Lalhriatzuali hi pianphunga rualbanlo a ni a; in a kan chhan hriat a ni lo. Lalhriatzuali ruang hi nizan khan lumen a ni a, vawiinah vui a ni ang.

Lalhriatzuali hi State Disaster Response Fund (SDRF) dan angin râlna (ex-gratia) Rs 4,00,000 pek a nih dawn thu chief minister Lalduhoma chuan social media hmangin a puang a, "Dan anga chhiatna tuartute ṭanpuina awm thei apiang ngaihtuahsak a ni ang," a ti.

In kâng hi Khawzawl SDC R Lalrinhlua leh SDC Lalthanpari Khawlhring ten an an enfiah a, sorkarin Lalhriat­zuali a ràlna Rs 4,00,000 an hlan nghal .

Nimin vêk khan Then­zawla Dilpuiah Dennis Vanbawih Thawng (16) s/o Ciato, New Siaha West-I a tla hlum. Thu dawn danin, Dennis-a hi Siahaa Adventist English Academy School zirlai niin, Thenzawlah Study Tour hmangin an kal a; nimin khan Dilpuiah an kal a, dilah chesualin a tla hlum. Dennis Vanbawih Thawng hi Thenzawlah thlahna hun hman a nih hnuah Siaha panpui a ni.