Vande Mataram a zavaia sak luihtir tumna Congress-in an do zel dawn

Mizoram Pradesh Congress Committee (MPCC) chuan nimin khan Aizawl Press Club-ah thuthar thehdarhtute an kâwm a; Mizoram, hnam leh sakhua a him zel theih nan Vande Mataram a zavaia sak luihtir tumna an do zel dawn tih an puang.

MPCC president Lal Thanzara chuan, Congress Working Committee (CWC)-in August 19, 2026 khan Indira Bhavan, Delhi-ah BJP sorkarin India mipui Vande Mataram sak luihtir an tum chungchang an ngaihtuah thu a sawi a, "Kum 1937-a CWC-in an lo rel tawh angin, hla châng khatna leh hnihna chauh sak ni se tiin thutlukna an siam a, cháng khatna leh hnihna hi ram hmangaihna thu leh hla a ni," a ti. Cháng dangte erawh chu Hindu sakhua (Durga leh Lakshmi) biakna leh fakna thu a nih avangin sakhaw dang betu tan sak a rem loh thu a sawi.

Lal Thanzara chuan, India chu sakhaw zalenna ram, pangpar huana pangpar chi hrang hrang mawi taka an par angin, mipui pawh chi, hnam leh sakhua inthliarna awm loa zalen taka khawsa tlâng o tur an nih thu a sawi a, "MPCC chuan kan ram, kan hnam, kan sakhua a him zel theih nan Vande Mataram a vaia sak luihtir tumna hi kan do zel dawn," a ti.

MPCC President chuan, Foreign Contribution (Regulation) Amendment Bill, 2026-in a tum ber chu, ram páwn aṭanga ṭanpuina hmanga minority leh Kristian ten India ram mipui tana an din zirna-in leh damdawi-in bakah, charity home-te chhuanlam chi hrang hrang hmanga tihtawp leh chhuhsak a nih thu a sawi.

FCRA Amendment Bill-ah chiang takin a inziah thu sawiin Lal Thanzara chuan, "Kohhran mipui ṭawngṭaina leh dodalna a nasat avangin BJP sorkar chuan Joint Parliamentary Committee (JPC) ngaihtuah atan a pe. JPC member-te hi a tam zawk BJP mi leh sa an nih dawn avangin Congress party chuan ṭha kan ti lo a, Bill hi Parliament-ah pass a nih loh nan hma kan la zel dawn," a ti.

MPCC-IN AN TARLAN DANGTE

☑ Kut hnathawktute chawikan nana Congress sorkarin a din MGNREGA chu BJP sorkarin VB-GRAMG-in an thlak a, mi harsa zawkten inhlawh fak nana an hman ṭhin kha tunah chuan thla tam tak an hnathawh hlawh hmu thei loin an awm.

☑ An inhlawh theihna ni zat a hma aiin a tlem a, VB-GRAMG hi hlawhtling lo tura duan sa a ni.

☑ VB-GRAMG Act-ah hian mipuiin thuneihna an nei tawh lo a, Central-in fund allocation-ah duhsak zawng leh duhsak loh state neih theihna thuneihna sang tak a nei.

☑ MGNREGA-ah chuan mipuiin thuneihna sang tak neiin, an mamawh angin sorkarin inhlawhna a siamsak ṭhin a, thlei bik nei loin Central-in 100% a tum.

☑ VB-GRAMG-ah chuan state lianin 40% a tum ang a, keini state tenau chuan 10% kan tum a ngai.

☑ Mipui aṭanga chhiah tipunga sum leh pai zawng ringawt sorkar tan kut hnathawktute hlawh tur 10% tum reng a harsa dawn.

☑ Kan sorkar leh a nih chuan kan hotute'n a ngai anga kut hnathawktute'n hamṭhatna an hmuh leh theih nan MGNREGA din ṭhat leh an tum.