SIR 2026 electoral roll hearing Siaha leh Lawngtlai dist-ah zo

Electoral roll observer K Lalthawmmawia chuan nimin khan Siaha leh Lawngtlai a tlawh a; Electoral Roll Special Intensive Revision (SIR), 2026 kal mek chungchangah sorkar hotute leh tlawmngai pawl hruaitute a kâwm. Siaha leh Lawngtlai district-ah SIR hearing zawh a ni tawh tih tarlan a ni.

Siaha DC conference hall-a ṭhutkhawmah K Lalthawmmawia chuan, electoral roll buaipui chu a namailo tih sawiin, "Mipui thlan sorkar siam tur chuan inthlanna thianghlim neih a ngai a, electoral roll felfai leh dik neih hi inthlanna thianghlim innghahna a ni. Siaha district hi hu international boundary hrûla awm a ni a, India khua leh tui ni lote nen inhnaih têa awm a nih avangin fimkhur hle a ṭul," a ti a; ram dang mite'n vote an neih loh nan fimkhur a ṭul thu a sawi.

Tarlan danin, SIR kalpui mekah Siaha district-ah roll-a thun luh dilna 1,752 leh roll aṭanga paih ngaite paih dilna 48 a lut a, Siaha bial leh Palak bialah hearing zawh a ni tawh. Insawifiah tura tih (notice generated) 11,850 an awm a, chung zinga mi 415 chu DEO, ERO leh AERO ten dik tâwk lo (ineligible)-a an ngaih an ni.

Lawngtlaiah chuan DC pisaah ṭhutkhawm niin, Observer chuan 'super checking' nei tura kal a nih thu a sawi a; September 7, 2026-ah final electoral roll târ chhuah tur a nih avangin, a hunah târ chhuah a nih theih nan theihtawp chhuah zel turin official-te a chah.

Lawngtlai district-a MLA bial pathum - Lawngtlai East, Lawngtlai West leh Tuichawng constituency-ah voter 90,699 an awm a; August 13, 2026 khan hearing zawh a ni tawh a, hearing-a inlan ngai mi 32,554 an awm. Roll-a thun luh dilna 4,070, paih (delete) dilna 68 bakah, insawn leh siamṭhat (transfer & correction) dilna 720 a lut a ni.