Union Minister-in smart meter vuah zawh vat duh; Chak taka hmala turin Power Minister-te a ngen

Union Power minister Manoharlal Khattar chuan August 25, Thawhlehni khan New Delhi-a a pisaah North Eastern Regional Power Committee hnuaia hmarchhak state Power Minister-te kawmin, smart meter vuah hna kalpui mek chu ngai pawimawh tur leh zawh vat a nih theih nan chak taka hma la turin a lo ngen.

New Delhi-a Union Power Minister hmua kal North Eastern Regional Power Committee hnuaia hmarchhak state Power Minister zingah hian Mizoram Power & Electricity minister F Rodingliana pawh a tel a; hmarchhak state Power Minister-te hian Union Power Minister hi India hmarchhaka power sector tihchangtlunna tur rawtna leh mamawh hrang hrang an sawipui a ni.

Union Power Minister hian hmarchhak state Power Minister-te chu smart meter vuah hna kalpui mek chu ngai pawimawh tur leh zawh vat a nih theih nan chak taka hma la turin a lo ngen a, "Mipuiten smart meter hnathawh dan dik tak an hriatthiam theih nana 'check-meter' vuah chu ngai pawimawh ang che u," a ti a; transmission lost titlem tura hma la zel tur leh a theih anga commercialization lam hawi turin a chah nghal a ni.

Hmarchhak state Power Minister-te hian regional power grid tihchangtlunna tur pawimawh hrang hrangte Union Minister hnenah hian thlenin, grid modernisation kalpui tur hian sum mamawhte ngaihtuahsak turin an ngen a; Power System Development Fund (PSDF) kalpui dan tihdanglam a nih tâk avanga hmarchhak state hrang hrangin project an thehluh tawhte special assistance kaltlanga tihhlawhtlin sak turin an ngen bakah, hmarchhak state-te tana project pawimawh bikte an thlen.

F Rodingliana pawhin hmarchhak tihhmasawnna tura ruahman, ministry 54-ten an budget aṭanga 10% zel hmarchhak tana an dahhranna tur, 10% Gross Budgetary Support (GBS) hman kawngah langtlang zawk leh ṭangkai zawka hman a nih theih nan ruahmanna siamsak turin Union Minister hi a ngen a; a bikin power sector tihhmasawn nan 10% GBS aṭanga sum tam zawk dah hrang turin a ngen tih sorkar thuchhuahin a tarlang.

Manoharlal Khattar chuan, hmarchhak state-ten power sector tihchangtlunna tur sum mamawh an thlente chu Union Finance Minister a lo sawipui tur thu a lo hrilh a, "Amaherawhchu, project sum mamawh zawng zawngte sorkar laipuiin a tum vek theih dawn loh avangin state nen ṭangtlanga tih a ngai dawn a, state-ten engzatnge an tum ve theih ang tihte chhût a, ruahmanna felfai tak siamho hnuah Ministry of Finance lamah nawr zui a ni ang," a ti.

Hmarchhak state Power Minister-te intelkhawmna North East Regional Power Committee (NERPC) hi Electricity Act 2003 behchhana Ministry of Power hnuaia din a ni a; hmarchhak state pasarihte member niin, chairman hi innih chhawk ṭhin a ni a, tunah hian Meghalaya Power Minister chu chairman ni mekin, term leh hi Mizoramin chairman hna a chelh hun tur a ni. Tun ṭuma hmalakna hi March 11, 2026-a 31st NERPC Meeting, Aizawla nghah a nih ṭuma thurel bawhzuina a ni.