Skywalk leh ropeway siama thubuai neite dilna thlen Hight Court-in a ngaihtuah

Gauhati High Court, Aizawl Bench chuan Sakawrhmuituai tlanga skywalk siam leh Chaltlang - Durtlang ropeway siamnaa sum tihchingpen chungchanga thubuai nei mi pathumte'n chhuah zalen an dilna chu August 24, Thawhṭanni khan a ngaihtuah.

Skywalk leh ropeway siam chungchanga thubuai nei mi pathum - Tourism minister hlui pahnih John Rotluangliana leh Robert Romawia Royte (tuna Hachhek bialtu MLA) leh MLA hlui Lalrindika Ralte-ten Special Judge (PC Act)-in June 24, 2026-a thubuai kalpui zel tura a tihna paihthla tura High Court-a ngenna an thehluh chu High Court-ah ngaihtuah a ni. He thilah hian thubuai kal lai aṭanga chhuah zalen dilna (discharge application) chu ngaihtuah tura Trial Court (Special Court, PC Act) lamin a tih tho avangin, hearing hi a case awm dan (on its own merit) aṭanga neih turin a ti.

Mi pathumte hian Special Judge-in June 24, 2026-a thutlukna a siam, an thubuai kalpui zel tura a tih chu High Court-ah hian an khing a ni. An ukilte chu thubuai neite hi an thiam thu sawi ve na hun pe loa an thubuai kalpui zel chu a dik lo tiin High Court ah hian an zualko a, an thiam lohna ngaihtuah chiang hmasa lo a, an thubuai kalpui zel chu dan kalh a nih thu an thlen. Thubuai theh luttute hian an thubuai kalpui zel tlak a nih lohzia an dilna chu ngaihtuah a nih hmaa thubuai kal zel chu a dik lo an ti.

Gauhati High Court chuan an ukilte remtih tlanna angin thubuai neiten chhuah zalen an dilna chu ngaihtuah tura Trial Court (Special Court, PC Act) lamin a tih tho avangin hearing hi a case awm dan (on its own merit) aṭanga nei turin a ti a ni.

He thubuai hi Anti Corruption Bureau (ACB) chuan chhuiin, chargesheet no. 2/2026 dt 10.03.2026 chu Special Judge (PC Act) Court, Aizawlah an thehlut a ni.

Sum tihchingpennaa inhnamhnawiha puh (accused) zingah Congress sorkar laia Tourism minister John Rotluangliana leh MNF sorkar laia Tourism minister Robert Romawia Royte bakah Congress MLA hlui Lalrindika Ralte te an tel a ni.