Jail tang tlan chhuak

Kumtling lo khuaikhem (POCSO Act) leh rûkrûk thubuai vanga man Emon Malsawmhlua s/o Malsawmdawngsanga, Rulchawm chu August 23, Pathianni chawhnu khan District Jail, Aizawl aṭangin a tlan chhuak a, hethuziahlai thleng hian man a la ni lo.

Prison department aṭanga Vanglaini thudawn danin, Emon Malsawmhlua hi rukruk thubuaiah hian thiam loh chantir a ni tawh a, POCSO Act hmanga thubuai an siam sak chu court-a ngaihtuahlai mek a ni.

Nimin chawhnu inkhawm laia, an zai bengchhen laiin nikuma jail bang chim PWD-in an siamṭhat mek bula TT hall kalhna chhu chhiain, bang an siamṭhat mek aṭang hian a tlan chhuak a ni.

Prison department hi guarding staff (jail warder) ah an indaih lo hle a, an manual ang chuan jail tang 6 hi warder 1 in an veng tur tih a ni. Amaherawhchu, hei hi kalpui hleihtheih a ni lo.

Warder pakhatin ward 3/4 te an ven a ngai. District Jail, Aizawlah pawh hian warder an indaih loh avangin warder 1 in ward 2, kitchen, hall-te an ven a ngai.

An ven lohna lam hi jail tangten an hmuh ve reng ṭhin avangin remchang an zawng ve ṭhin a ni.