Green Tourism Campaign hmang

Mizoram Pollution Control Board hnuaia EIACP Hub chuan nimin khan Lalsavunga Park, Hlimenah Green Tourism Campaign hun an hmang a; khualzinte leh veivâkte tana inzirtirna thuziak (signboard) an tar bakah, bawlhhlawh báwm eng emaw zat an dah.

Green Tourism Campaign-in a tum chu, khualzinte zingah bawlhhlawh sâwngbâwl danah hmasawnna leh nungchang ṭha zawk thlentir a ni a; chumi atan chuan Park tlawhtute'n awlsam taka an hmuh theih turin zirtirna thuziakte tárin, bawlhhlawh báwmte an hûng a ni. Sakawrhmuituai tlangah pawh hma an lo la tawh a, state chhung leh pawn lam khualzinte'n an tlawh tam hmunahte hmalak zel an tum bawk.

EIACP Hub programme officer Benjamin Lalnunsanga Colney chuan, Green Tourism Campaign chu Mizoram chhunga khualzin leh veivakte hnenah bawlhhlawh paih darh lo tur leh, hmun mawi awmte tihbawlhhlawh loh a pawimawhzia inzirtirna a nih thu a sawi a, "Bawlhhlawhte hi a paihna tur hmun dik tak bawlhhlawh bâwma kan paih ṭheuh chuan kan hmunhmâte hi fai takin a awm reng dawn a ni," a ti.