MADC sum harsatna phuhrûk nan One time grant pek kan tum - CM

Chief minister Lalduhoma chuan nimin khan Siaha DC Pisapui thar a hawng a; Mara Autonomous District Council (MADC)-in sum harsatna a neih zualpui phuhrûk nan one time grant pek tum a nih thu a sawi.

Lalduhoma chuan, MADC-ah sorkar chak leh nghet a awm theih nan Mizoram sorkarin ruahmanna a neih thu a sawi a, "Mizoramin a hrana Finance Commission a neih hnuah state sorkar bakah autonomous district council (ADC)-te leh local body-te sum dawn tur chu an ruahmanna angin a kal ṭhin a, an ruahman dan bâkin kal theih a ni lo. Tuna MADC sum indaih lohna hi a pawi hle a, an harsatna zualpui phurhrûksak nan one time grant pek kan tum," a ti.

Siaha district tihchangtlunna turin Mizoram sorkarin nasa takin hna a thawh mekthu sawiin CM chuan, "Siaha district-ah khualzinte hîp thei tourist destination ṭha tak tak a awm a, chu'ngte tihchangtlunna turin ruahmanna ṭhahnem tak siam a ni a, chu'ng zingah chuan KMMTTP Road - Castle of Beino kawng siamna atan cheng nuai 1,326 leh Palak Dil panna kawng siamna tur cheng nuai 2,161 dah a ni tawh," a ti a; state sorkar leh sorkar laipui hnuaia hmalaknate a tarlang.

Chief Minister chuan, Mizoram sorkarin thangṭhat lak a tum ringawt lo tih sawiin, "Ram hmasawnna leh ro hlu kan ngai pawimawh," a ti a; hmalaknate ṭha taka thawk zel turin department tin a chah bakah, khaw tina VC-te leh tlawmngai pawlte chu department hnathawhte en zuinaah thawhpui turin a sáwm.

DC Pisapui sak thar hawnna hi additional DC Abraham Beirazi Khithie-a'n a kaihruai a; Palak bialtu MLA K Hrahmo leh bawrhsap VL Hruaizela Khiangte bakah, mi pawimawh dangte an tel.

Siaha DC Pisapui sakna atan New Economic Development Programme (NEDP - Congress hun laia policy) aṭangin Rs 5,09,08,023 hmuh a ni a; October 31, 2018-ah sak ṭan niin, December 1, 2025-ah sak zawh a ni.