Mizoramah ration card 2,94,008 awm mek; Insawnnaah card eng/pawl a chhawm theih

Mizoramah ration card nei chhungkua 2,94,008 an awm mek a; ration card eng (yellow) leh pâwl (blue) neite chuan an awmna khua/veng an sawnin, an insawnna hmunah an ration card neih sa an chhawm thei tawh.

Food, Civil Supplies & Consumer Affairs (FCSCA) minister B Lalchhanzova chuan Vanglaini palai zawhna chhángin, tun hmaa awmna khua/veng sawn vanga ration card dinhmun danglam ṭhin chu tihtawp a nih tawh thu a sawi a, "Nikum September khan hriattirna kan tichhuak a, mahse, harsatna tâwk an la awm fo. Awmna khua/veng sawn avangin mirethei kha a hausa thut lo a, chuvang chuan, card eng leh pâwla awmte chuan an awmna an sawnna hmunah an awmna hluia an ration card an chhawm thei tawh," a ti.

Ration card eng/pawl neite chu an pêmna hmunah ration card vár (white)-ah thun loh tur a nih thu sawiin Minister chuan, "Anmahni zawkin card var/senah ka awm duh an tih chuan a theih a, mahse, quota a awm tawh lo tih avangin card varah sawn loh tur. Card eng/pawl neite quota chu an awmna hmasa retailer aṭangin an awmna hmun thara retailer-ah sawn tur a ni," a ti a; ration card kaihhnawiha harsatna nei tan toll free number 1967-ah biak theih a nih thu a sawi.

FCSCA Minister chuan, Mizoramah ration card 2,94,008-ah mi 11,74,628 an awm mek thu a sawi a, "Heng zingah hian 'Ration buhfai lak kan ngai lo, mahse, thil pawimawh atan ration card kan la mamawh' titu - not eligible to ration (NER) card 11,653 an awm a, mi 28,661 an ni," a ti. Mizorama ration card dinhmun https://fcsca.mizoram.gov.in ah en theih a ni.

B Lalchhanzova chuan, 'Mirethei leh harsate card varah awm suh se' tih chu a aupui nasat thu sawiin, "Tunah hian ration card eng leh pawl - National Food Security Act (NFSA) hnuaiah quota mi 7,06,296 kan neih aṭanga 7,04,009 hnawhkhah a ni a, mi 2,287 tan quota ala awm," a ti.

NFSA-ah quota 2,287 a la ruah chhan sawiin Supply Minister chuan, "Hmun hrang hrangah card vára awm àwm tak card pâwl leh enga awmte card varah dah an ni a, siamrem ngaite siamremin, mitthi tawhte paih zel an nih avangin quota ruak kan nei a ni," a ti a; NFSA quota ruak chu hnawhkhah a nih pawhin a leng lote tan card sen a awm thu sawiin, card sen chu tihpun zel a, card var tihtlem zel tum a nih thu a sawi.