Zoramthanga BA certificate hlan a ni

Gauhati University chuan nimin khan an seminar hall-ah MNF president leh chief minister hlui Zoramthanga chu Bachelor of Art degree certificate an hlan.

Zoramthanga hian Gauhati University hnuaia awm ṭhin Dhanamanjuri College (DM College), Imphal, Manipur-ah BA (English) a zir. kum 1966-a final year exam zawh veleh ram leh hnam tan zalenna sual tura MNF a zawm avang leh, inremna awm hnuah pawh politics-ah a hun pum a hman zui avangin BA degree certificate a la ve thei lo a; nimin khan Gauhati University chuan an hlan a ni.

Certificate inhlanna inkhawmah hian Zoramthanga pualin 'From Guerrilla Fighter to a Peacemaker by Shri Zoramthanga' thupui sawihona hun buatsaih nghal a ni a; tun hnaia a lehkhabu ziah 'From Guerrilla Fighter to Chief Minister' tih, Penguin Random House, India tihchhuah behchhan leh Zoramthanga hringnun zinkawng behchhana buatsaih a ni.

Inkhawm hi The Gauhati University Institute of North East India Studies (GUINEIS) and Omeo Kumar Das Institute of Social Change and Development (OKDISCD) buatsaih a ni a, university zirtirtute leh zirlai sang rualte nen hun hman a ni.

Zoramthanga chuan, a puala hun ropui leh chhinchhiah tlak tak buatsaihtute chungah thinlung taka a lawm thu a sawi a, "Ka tan mellung pawimawh, ka hriat reng tur leh ngaihhlut berte zinga mi a ni," a ti.

Certificate hlanna neih zawh hian Special Lecture-Cum Interac-tive Programme neih zui a ni a, Gauhati University zirtirtute leh zirlaite nen zawhna leh chhanna hun an hmang.

Zoramthanga hi MNF senior vice president Dr R Lalthangliana, MLA hoin MNF leh MNYF hruaitu eng emaw zatin an ṭawiawm a ni.