Lalsavunga Park enkawl danah Hlimen lâwm lo; Enkawltu contract Aug. 2026-a tihtawp an phût

Hlimen Local Council leh NGO-te chuan thuchhuah siamin, an veng chhunga Lalsavunga Park enkawl a nih danah an lawm lo a, August 2026 chhung ngeiin a enkawltu (contractor) Oasis Lalruattluanga contract tihtawp an phût. Park hi Rural Development & Administration department-a Directorate of Local Administration hnuaia awm a ni.

Hlimen LC leh NGO-te chuan, Lalsavunga Park chu khualzin tam takin an tlawh ṭhin avangin Mizoram hmél lanna pakhat a nih thu an tarlang a, "Rawih lam pan zawng leh enkawl ṭhat ni loa a awm hi Hlimen khawtlang chuan pawi kan ti. Chuvangin, Lalsavunga Park enkawltu Pu Oasis Lalruattluanga hi Department hian August 2026 ral hmain a contract a cancel lo a nih chuan tlawh theih loh turin tiam chin awm loin kan dang dawn," an ti.

HLIMEN KHAWTLANGIN AN TARLANTE

☑ Contractor hian kum 3 a enkawl chhungin kum tin department hnena sum a chhûn luh tur cheng nuai 20 bakah, kum tin 6.5% compound interest pung tura tih a ni. RTI Act chhanna aṭanga a lan danin, kum 1-na leh kum 3-naah a pe kim lo a, hei hi agreement bawhchhiatna a ni. Vawi khat chauh pawh a pe kim lo a nih chuan LAD-in a cancel sak theih thu agreement-ah ziah a nih laiin, a kum 3-na (August 2025–August 2026)-ah Rs 5,67,122 chauh chhûn luh a ni a, department-in hmalakna a nei lo.

☑ Department leh contractor inremnaah Park vawn fai kawngah leh department bungrua ṭha taka enkawl bakah, Park chhung kum tin vawi hnih sâm fai, infrastructure kum khat dana rawng hnawih leh a ṭul anga siamṭhat tura tih a ni. Mahse, Park vawn fai leh chei ṭhat hnate hi thawh mumal a ni lo. Inremna hi zawm a nih loh chuan contract cancel thlenga action lak theih tih a nih laiin, department-in hma a la lo.

☑ Inremnaah Park bungrua eng pawh contract hun chhunga chhia a awm a nih chuan contractor-in Department ruahmanna anga siamṭha ṭhin tur tih a nih laiin, leilâwn leh construction work dangte hi enkawl mumal lohin a awm. Hei hi Park hmangtute tan a him loh bakah, thihna hian thlen theihna thil a ni.

☑ Department leh contractor inremnaah eng emaw ber pawh bawhchhiat a nih chuan, LAD-in contractor hi hriattirna pein insawifiah turin a ti ang a, a insawifiahna pawm a nih loh chuan LAD-in a titawp thei ang tih a nih laiin, inremna chang hrang hrang bawhchhiat a ni chungin Department aṭangin hmalakna a awm lo.