TB veite enkawl pawimawhzia inzirtir

National TB Elimination Programme, Lawngtlai district bultumin nimin khan DC Conference Hall-ah 'Campaign on Community Support to TB Patients' buatsaih a ni a; ngawr (TB) enfiahna neih nghal niin, adviser to chief minister (Health) Dr Lorrain Lalpekliana Chinzah, Lawngtlai East bialtu MLA-in a hmanpui.

Dr Lorrain Lalpekliana Chinzah chuan, TB vei mekte'n chaw ṭha leina an neih theihna tura hmalakna chu a pawimawh avangin a ngaihhlut thu a sawi a; TB veite zawn chhuah leh enkawlnaah NTEP Lawngtlai District hnathawh a chhuanawm thu sawiin, taima taka thawk zel turin a fuih.

Lawngtlai East MLA chuan, TB chu tihdam theih natna a ni tih hriat chian a ṭul thu sawiin, "Chutihrualin, enkawl hma leh damdawi ei ṭhat a pawimawh hle," a ti a; TB veite chu damdawi ei ngai pawimawh turin a chah.

Dr Lorrain Lalpekliana Chinzah hian TB veite'n ei tur ṭha an leina tura hmalakna 'Nikshay Mitra' (Food Basket) chu a ngaih pawimawh thu a sawi a; Nikshay Mitra atan hian MLA fund aṭangin, Rs 1,51,200/ a hlan nghal a, TB vei mi 36-te chaw ṭha leina tur daih a ni.

Lawngtlai district-a treatment supervisor James Zarzoliana tarlan danin, Lawngtlai district-ah kumin January-August chhungin TB vei mi 90 enkawl an ni a; Nikhay Mitra-ah chaw ṭha leina tur sum thawhtu mi 67 awm an awm mek. Nikshay Poshan (Nutritional Support) kaltlangin TB veite'n thla tin Rs 1,000 an dawng bawk.