Police-in hmun 3-ah heroin an man

Mizoram Police chuan August 10, Thawhṭanni khan hmun pathumah heroin an man a, a kaihhnawihah mi paruk an man.

Zokhawthar Police chuan Manipur aṭanga Mizorama lutte Ṭiau leia an endiknaah August 10 zing dar 8 vel khan C Lalengmawii (56) d/o Lalbiaka (L), Lawipu BSUP, Aizawla cheng nia inchhálin a ken bawnghnute powder báwm aṭangin heroin gram 25 an man a, Lalengmawii lakah thubuai an ziak lut.

Zan dar 7:30 velah Zokhawthar police-te chuan Myanmar ramri, Vang Kai, Zokhawthar bulah Myanmar aṭanga lut mi pahnih - Biakchawimuana (38) s/o Lalchuanmawi, Khawmawi, Myanmar leh Rodinlian (36) s/o Chatuanlal, Khawmawi, Myanmar te hnen aṭangin heroin gram 65 an man a; heroin phurhna Kenbo bike leh phone pahnih an hrènsak bawk.

Mi pahnihte hian heroin chu Zirsangzeli (36) w/o Lalhmingthanga, Zokhawthar an pek tur a nih thu police-te an hrilh a; police-te chuan Zirsangzeli chu Zokhawthara a chenna inah man zui a ni.

Saitual police-te chuan an thu dawn bawhzuiin August 10 tlai dar 4 vel khan Myanmar lam aṭanga Guwahati pan tur Bolero AS-17 E-6506 an endik a, lirtheia chuang Vungngailun (28) d/o Tuila, Manipur thawmhnaw hâk chhungah heroin gram 292 an man a ni.