Aizawla day care centre 3 endik

Aizawl district tana ruat Inspection Team chuan nimin khan Aizawla day care centre pathum - Trinity Day Care Centre, AR Day Care Centre leh Zote Day Care Centre an tlawh a, mipui tana him lo leh hriselna khawih pawi thei a awm leh awm loh an enfiah.

Day care centre-te hi Clinical Establishment Act kengkawhtu Aizawl District Registering Authority thuchhuak anga endik a ni a; Inspection Team-ah hian Aizawl District Magistrate aiawh, Aizawl Municipal Corporation aiawh, Aizawl SP aiawh leh Health department aiawh te an tel. August 10 khan day care centre pali an lo endik tawh bawk.

Clinical Establish­ment Act hi sorkar laipui dan a ni a; clinical establishment zawng zawng, damlote damdawi leh endikna (investigation) hmanga enkawlna hmun - hospital, clinic, dental clinic, laboratory, imaging centre leh inenkawlna hmun hrang hrangte a huam.

Clinical Establishment Act hian day care centre hrang hrangte inkhuahkhirhna dan a siam a, an inziah luh (register)-na tur a siamsak bawk.